SQO-da sýǵa ketken áıel men balany qutqarǵan shekarashy marapattaldy
PETROPAVL. QazAqparat - Petropavl qalasynda «Sýǵa batqandardy qutqarǵany úshin» medalimen QR UQK Shekara qyzmetiniń áskerı qyzmetshisi Sergeı Gaıdaı marapattaldy, dep habarlaıdy QazAqparat tilshisi.
Soltústik Qazaqstan oblystyq Tótenshe jaǵdaı departamenti baspasóz qyzmetiniń habarlaýynsha, saltanatty sharaǵa departament basshylyq quramy men qyzmetkerleri, azamattyq qorǵaý organdarynyń ardagerleri, BAQ ókilderi qatysty. Departament bastyǵynyń orynbasary Erik Sarybaev sýǵa ketkenderdi qutqarýǵa oılanbastan sheshim qabyldaǵan Sergeı Gaıdaıdyń erligi men batyldyǵyn erekshe atap ótti.
«Sergeıdiń jasaǵany erlik. Ony qyzmetinen tys ýaqytta jasady. Ol áıel adam men onyń balasyna tóngen qaýipten úreılenbeı, beıjaı qaramaı sýǵa sekirip, olardy jaǵaǵa shyǵaryp, zardap shegýshilerge qajetti alǵashqy kómekti kórsetken. Sergeı Nıkolaevıch biz sııaqty «Ar-namys jáne borysh - Otanǵa qyzmet etý» atty uranmen ómir súrip, qyzmet atqaryp júrgen azamat. Búgin marapat óz ıesin tapty», - dedi Erik Sarybaev.
Eske sala ketsek, oqys oqıǵa mamyr aıynyń sońynda Sh.Ýálıhanov aýdanynyń Bıdaıyq aýylynda boldy. 5 jasar Nurádı Jetpisov pen onyń anasy Mahabbat kópir arqyly ózenniń ar jaǵyna ótpek bolǵan. Alaıda búldirshin sýǵa qulap ketken. Balasyn qutqaramyn degen anada artynan ózenge sekirgen. Ol jerdegi sýdyń tereńdigi 2-3 metr eken. Júzý bilmegendikten ekeýi birdeı bata bastaǵan. Sol mańǵa balyq aýlaýǵa kelgen QR UQK Shekara qyzmetiniń áskerı qyzmetshisi Sergeı Gaıdaı aıqaıdy estip, ana men balaǵa kómekke kelgen. Ol oılanbastan, anasy men balasyn qutqarý úshin ózenge sekirgen. Shekarashy Mahabbat Jetpisova men onyń esinen tanyp qalǵan balasyn jaǵaǵa alyp shyqqan. Sergeı Gaıdaı balaǵa alǵashqy medıtsınalyq kómek kórsetip, oǵan jasandy demalys pen júregine massaj jasap, betin beri qaratypty.
Sergeı Gaıdaı QR Іshki ister mınıstrliginiń «Sýǵa batqandardy qutqarǵany úshin» medalimen marapattaldy.
