SQO-da sýǵa kete jazdaǵan 20 adam qutqaryldy
PETROPAVL. QazAqparat - Jedel qutqarý jasaǵynyń qyzmetkerleri 4 kún ishinde Soltústik Qazaqstan oblysynyń 20 turǵynyna kómek kórsetti. Olar úshin osy jolǵy shomylý sońǵy bolýy múmkin edi, dep habarlaıdy QazAqparat tilshisi.
Tótenshe jaǵdaılar departamentiniń baspasóz qyzmetiniń málimetinshe, qaıǵyly oqıǵalardyń birnesheýi úrlemeli matrastardyń kesirinen bola jazdaǵan. Pestroe kólinde úsh erkek pen bir áıel matrastyń ústine minip, sýdyń qalqyma belgisinen ary asyp júze bergen. Qatty soqqan jel men tolqyndardyń aǵynynan matras sýdyń tereń jerinde aýdarylyp túsken. Óńirde dál osyndaı jaǵdaı 39 jastaǵy er adam men 14 jastaǵy jasósipirimniń basynan ótken.
«Shomylǵan kezde úrlemeli matrastarǵa senýdiń qajeti joq. Olar sýda demalýǵa arnalmaǵan», - dep eskertedi qutqarýshylar.
Dál osy Pestroe kólinde 4 jigit katamaranǵa otyryp, qalqyma belgiden ary asyp júzip ketken. Alaıda óz betterimen keri qaıtýǵa shamalary jetpegen. Kelesi kúni 13 jáne 14 jastaǵy jasóspirimder tap osyndaı jaǵdaıǵa kez bolǵan.
Esil ózeniniń qalalyq jaǵajaıynda taǵy da 6 adam qutqaryldy. Kelinshek jelmen ushyryp áketken matrasqa jetemin dep, álin eskermeı, sýǵa bata bastaǵan. Qalanyń taǵy bir turǵynynyń sýda aıaǵy tartylyp qalǵan.
Jyldyń basynan beri qutqarýshylar qalanyń sý qoımalarynda 23 adamdy ajaldan aman alyp qaldy. Olardyń 5-i - balalar.
