SQO-da sý aıdyndarynda balyqtardyń qyrylýynyń aldyn alý sharalary qolǵa alyndy

PETROPAVL. KAZINFORM — Soltústik Qazaqstan oblysynda muz ben qardyń qalyńdaýyna baılanysty sý aıdyndarynda aeratsııa jumysy bastaldy.

SQO boıynsha balyq ınspektsııasynyń málimetinshe, muz qalyńdaǵan saıyn sýdaǵy otteginiń mólsheri azaıady. Saldarynan sý jándikterine tirshilik etý qıyndap, balyqtardyń jappaı qyrylý qaýpi paıda bolady. Bul balyq qorynyń azaıýyna jáne sý aıdyndarynyń bıologııalyq tepe-teńdiginiń buzylýyna ákelýi múmkin.
Osyǵan baılanysty óńirde sý aıdyndaryndaǵy balyqty qyrylýdan saqtaý maqsatynda keshendi sharalar júrgizilip jatyr. Aeratsııany jasaýǵa, ıaǵnı kólderdi ottegimen qanyqtyrý jumystaryna sý aıdyndaryn jalǵa alǵan kásipkerler jaýapty. Al rezervtik jáne ózge de sý aıdyndarynda balyqtardyń qyrylýyna qarsy is-sharalardy jergilikti atqarýshy organdar júrgizedi.

Mamandar qazir kóldiń muzyn oıyp, burǵylap tesikter jasap jatyr. Bir sý qoımasyna keminde osyndaı 100 tesik jasalynady. Bul jumysqa tehnıka da tartylady. Keıin oıyqtarǵa qamys baılamdary salynady.

— Bul sharalar sýdaǵy ottegini belgili bir deńgeıde ustap turýǵa múmkindik beredi jáne balyqtardyń tirshilik etýine qolaıly jaǵdaı jasaıdy. Sonymen qatar sý aıdyndarynyń jaǵdaıyn turaqty baqylaý, ýaqtyly áreket etý jáne jaýapty uıymdardyń úılesimdi jumysy ekologııalyq qaýipterdiń aldyn alýda sheshýshi ról atqarady, — deıdi balyq ınspektsııasynyń ókilderi.

SQO-da qazirgi ýaqytta balyǵy bar 600-den astam kól bar. Onyń 295-i — kásipkerlerge jalǵa berilgen. Bul sý aıdyndary óńirdiń ekojúıesinde, sondaı-aq balyq sharýashylyǵy men jergilikti halyqtyń turmysynda mańyzdy ról atqarady.

Buǵan deıin Qostanaı oblysy Jangeldın aýdany Torǵaı ózeninde balyq qyrylǵany týraly áleýmettik jelilerde taraǵan habarlamalardan keıin Ekologııa jáne tabıǵı resýrstar mınıstrligi oqıǵanyń sebebin anyqtaý jáne tergeý úshin oqıǵa ornyna komıssııa jiberetinin jazǵan edik.