SQO-da sýarmaly alqap aýmaǵy artyp keledi
PETROPAVL. KAZINFORM — Soltústik Qazaqstan oblysyndaǵy negizgi eki bógen: Sergeev sý qoımasy — 100%, Petropavl sý qoımasy 90,9% tolǵan.
Esil basseındik sý ınspektsııasynyń málimetinshe, bul kórsetkishter óńirdegi sý resýrstarynyń jetkilikti deńgeıde ekenin jáne sý tutynýshylardy qajetti kólemde qamtamasyz etýge múmkindik bar ekenin kórsetedi.
— Bıyl jergilikti atqarýshy organdar sýarmaly jerlerdiń kólemin 47 myń gektarǵa deıin ulǵaıtýdy josparlady. Onyń ishinde Aqmola oblysynda — 33,7 myń ga, al Soltústik Qazaqstan oblysynda 13,3 myń ga jerdi sýarý kózdelgen. Esil sý sharýashylyǵy basseıniniń ereksheligi — munda magıstraldyq sýarý kanaldary joq. Sýarý jumystary árbir sý paıdalanýshynyń ózine tıesili sý alý qurylystary arqyly júzege asyrylady. Olar sýdy paıdalaný úshin Inspektsııa beretin arnaıy ruqsatty alýy tıis, — deıdi Sý resýrstaryn retteý, qorǵaý jáne paıdalaný jónindegi Esil basseındik sý ınspektsııasy basshysynyń orynbasary Gúlden Ismaǵulova.
SQO boıynsha qazirgi ýaqytta sýarý maqsatynda sý paıdalanýǵa 58 ruqsat bar. Óńirdegi sýarmaly alqap aýmaǵy — 18 myń ga shamasynda. Al ruqsat etilgen sý alý kólemi — 47,3 mln tekshe metr.
Onyń ishinde 8 ruqsat boıynsha sý jerasty kózderinen alynady. Qalǵanynda jerústi sý nysandarynan alýǵa ruqsat berilgen.
Baqylaýdyń negizgi baǵyttarynyń biri — ruqsat etilgen sý alý kólemderiniń saqtalýyn qamtamasyz etý jáne sýdy zańsyz paıdalanýǵa jol bermeý.
Buǵan deıin Qazaqstanda Sý resýrstarynyń ulttyq aqparattyq júıesi iske qosylǵanyn jazǵan edik.
