SQO-da sý tasqynyna daıyndyq boıynsha oqý-jattyǵý ótip jatyr
PETROPAVL. QazAqparat - Soltústik Qazaqstan oblysynda «Kóktem - 2019» respýblıkalyq komandalyq-shtabtyq oqý-jattyǵýy bastaldy, dep habarlaıdy QazAqparat tilshisi.
Tótenshe jaǵdaılar departamenti baspasóz qyzmetiniń aqparaty boıynsha, bıyl respýblıkalyq oqý-jattyǵý shtaby Petropavlda ornalasqan. Basqarý organdary, memlekettik azamattyq qorǵanys júıesi kúshteri sý tasqynyna ázir.
Oqý-jattyǵýdyń alǵashqy kúni Tótenshe jaǵdaılar jónindegi komıtet tóraǵasynyń orynbasary Marat Kúldikovtyń jetekshiligimen jınalys ótti.
«M.Kúldikov óz sózinde kóktemgi sý tasqyny kezeńinde tótenshe jaǵdaılardy joıýdyń, óńiraralyq is-qımyldardy úılestirýdiń, azamattyq qorǵaý memlekettik júıesin tıimdi paıdalanýdyń mańyzyn atap kórsetti», - dedi baspasóz qyzmetinen.
Ortalyq jáne jergilikti atqarýshy organdardyń ózara is-qımyldary jáne apatty jaǵdaılar boıynsha jurtshylyqty der kezinde qulaqtandyrý, qaýipsiz aımaqtarǵa alyp shyǵý múmkindikteri saralandy.
Sý tasqynyna qarsy is-sharalarda onyń aldyn alý joldary áldeqaıda tıimdi ekeni atap kórsetildi. Qardy jınaý jáne shyǵarý, aryqtardy tazalaý, ınertti materıaldarmen qamtamasyz etý jaǵdaıy barynsha eskerildi. Azamattyq qorǵaý qurylymdary kúshteriniń jáne halyqtyń sý tasqyny kezeńinde is-qımyldary boıynsha arnaıy-taktıkalyq jattyǵýlar ótkizý, sondaı-aq azamattyq qorǵaýdyń memlekettik júıesiniń aýmaqtyq jáne salalyq kishi júıeleriniń qyzmetin der kezinde joǵarǵy ázirlik rejımine keltirý máselelerine erekshe mán berildi.
«Kóktem - 2019» oqý-jattyǵý sharalary eki kúnge josparlanǵan.
