SQO-da sý tasqynymen kúreske arnalǵan tehnıkanyń daıyndyǵy tekserildi
PETROPAVL. QazAqparat – Petropavlda Soltústik Qazaqstan oblysy aýmaǵynda sý tasqyny bolǵan kezde jedel áreket etýge arnalǵan tótenshe jaǵdaılar departamentiniń tehnıkasy tekserildi, dep habarlaıdy QazAqparat tilshisi.
SQO TJD baspasóz qyzmetiniń málimetinshe, is-shara barysynda vedomstvo basshylyǵy men qurylymdyq bólimshelerdiń ókilderi tehnıkanyń, jabdyqtardyń jınaqtylyǵy men jaramdylyǵyna, olardyń tıisti talaptarǵa sáıkestigine nazar aýdardy.
«Sý tasqyny kezinde jedel áreket etý úshin oblysta Departamenttiń kúshteri men quraldarynyń toby quryldy, onyń quramyna órt sóndirý bólimderi men jedel qutqarý jasaǵynyń qyzmetkerleri kirdi. Barlyǵy 7 negizgi top qurylǵan. Olar oblystyń aýdandaryna, asa qaýipti ýchaskelerge aldyn ala jiberiletin bolady. Jeke quram kombınezon jáne qutqarý keýdesheleri túrindegi qorǵanys quraldarymen qamtamasyz etildi», - deıdi SQO TJD bastyǵynyń orynbasary Ýral Ábdirahmanov.
Negizgi toptyń quramynda jeke quramnan 160 adam jáne 32 arnaıy tehnıka bar. Árqaısysy júzý, sý sorý quraldarymen jaraqtandyrylǵan.
Sondaı-aq, ózara is-qımyl aıasynda sý tasqynyna qarsy is-sharalarǵa Ulttyq ulannyń áskerı qyzmetshilerinen, 6637 áskerı bóliminiń jeke quramynan 60 adam jáne 3 tehnıka tartylmaq.
«Bul toptar kóktemgi sý tasqyny kezindegi qaýipterdiń aldyn alý jáne joıý boıynsha is-sharalar uıymdastyryp, oblystyń sý akvatorııalaryna, onyń ishinde Aıyrtaý jáne Ǵ.Músirepov aýdandarynyń shaǵyn ózenderine monıtorıng júrgizedi. Qajet bolǵan jaǵdaıda olar ózenderde keptelis bolmaý úshin muzdy usaqtaıdy, evakýatsııalyq is-sharalarǵa qatysady», - deıdi tótenshe jaǵdaıdy joıý bóliminiń bastyǵy Serik Naýryzbaev.
