SQO-da sý tasqynymen kúreske 2 myńǵa jýyq adam, 1,5 myńnan astam tehnıka tartylmaq
PETROPAVL. QazAqparat – Soltústik Qazaqstan oblysynda sý tasqynymen kúreske bıyl bıýdjetten shamamen 500 mln teńge qarastyrylǵan, dep habarlaıdy QazAqparat tilshisi.
SQO Jumyldyrý daıarlyǵy jáne azamattyq qorǵaý basqarmasynyń málimetinshe, sońǵy jyldary aýdandardyń materıaldyq-tehnıkalyq bazasyn nyǵaıtý maqsatynda oblystyq bıýdjetten 355 mln teńge jumsaldy. Bul somaǵa 26 – «MTZ-82», 3 – «K-704» traktorlary satyp alyndy.
Budan basqa basqarma ónimdiligi joǵary 5 motopompa, 15 sorǵy satyp alyp, birneshe aýdan ákimdiginiń jáne TJD men «Qyzyljar sý» JShS kommýnaldyq menshigine berdi. Qazirgi ýaqytta basqarmanyń ballansynda 8 adamdyq bes motorly qaıyq bar. Bıyl 100 adamǵa shaqtalǵan shatyrly qalashyq alýǵa 42 mln teńge bólingen.
«Aýdandar men Petropavl qalasy ákimdikteriniń tarapynan kóktemgi sý tasqynyna jeke quramnan 1911 adam, 1540 ınjenerlik jáne joǵarǵy ótimdi tehnıka, onyń ishinde 329 sý sorǵysh jáne 122 júzý quraldary daıyndaldy. Oblystyq bıýdjette qarastyrylǵan 504 mln teńgeniń 202 mıllıonyn tótenshe jaǵdaılardy joıý úshin, al shuǵyl shyǵyndarǵa 301 mln teńgesi bólingen. Jáne de oqys oqıǵalardyń aldyn alýǵa qosymsha 167 mln teńge qarastyrylǵan», - deıdi SQO Jumyldyrý daıarlyǵy jáne azamattyq qorǵaý basqarmasynyń bastyǵy Nurlan Búrkitalın.
Mamandardyń aıtýynsha, sý tasqynymen kúreske 189 tonna jaǵarmaı, 17 tonnadan astam ınertti materıal jáne 29 myń qap ázirlendi.
Al tótenshe jaǵdaıdyń aldyn alý úshin basqarmaǵa ózender men akvatorııalarda jarylys jumystaryn júrgizý úshin 4,5 mln teńge, ǵaryshtyq monıtorıngke 6,5 mln teńge jáne oblys aýmaǵyn áýe kóligimen barlaýǵa 13,4 mln teńge bólindi.
Mamandardyń boljamynsha, bıyl qardyń qalyń jaýýynan kóktemgi sý tasqyny SQO-da qıyn bolǵaly tur. Jalpy óńirde sý basý qaýpi bar 90-nan astam eldi meken bar. Osyǵan oraı arnaıy qyzmetter ázirlikterin qaıta-qaıta pysyqtap jatyr.
