SQO-da sý tasqyny bolýy múmkin aýdandarda ylǵal qory anyqtalyp jatyr
PETROPAVL. QazAqparat – Soltústik Qazaqstan oblysynda mamandar kóktemde sý tasqyny bolýy múmkin aýdandarda ózender men sý qoımalarynyń basseınderin zerttep, alqaptardaǵy, jyralardaǵy ylǵal qorynyń kólemin aıqyndap jatyr, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, kóktemgi sý tasqyny bolýy múmkin aýmaqtar vedomstvo mamandary men jergilikti atqarýshy organdardyń turaqty baqylaýynda. Óńirde 4 aýdandy sý basý qaýpi bar.
Qutqarýshylar «Qazgıdromet» RMK fılıaly qyzmetkerlerimen birge oblystyń Ǵabıt Músirepov, Aıyrtaý, Esil jáne Taıynsha aýdandaryndaǵy ózender men sý qoımalarynyń basseınderindegi sý rettegishterdi tekserýdi bastady. Budan basqa mamandar alqaptaǵy, jyralardaǵy ylǵal qorynyń kólemin aıqyndaıdy.
«Ylǵal qorynyń kólemi aýa-raıyna baılanysty. Qystyń ótken aılarynda jaýyn-shashyn normaǵa saı jaýdy, keı jerlerde normadan joǵary boldy. Oblys boıynsha topyraqtyń kúzgi ylǵaldaný kórsetkishteri kóp jyldyq kórsetkishterden 39 %-ǵa tómen. Al Aqjar jáne Taıynsha aýdandarynda qar jamylǵysynyń bıiktigi 11-16 sm bolsa, Aqqaıyń, Jambyl jáne Jumabaev aýdandarynda 30-38 sm-ge deıin jetedi. Oblystyń qalǵan aýmaǵynda ortasha kórsetkish 20-27 sm shamasynda», - deıdi SQO TJD tótenshe jaǵdaılardyń aldyn alý bóliminiń bastyǵy Sáken Aǵzamov.
Mamannyń aıtýynsha, qysta soltústik óńirde jaýyn-shashyn mólsheriniń normasy - 62-95 mm, bıyl 28-150 mm aralyǵynda jaýǵan.
«Oblys aýmaǵynyń basym bóliginde jaýyn-shashyn normaǵa jýyq, Ýálıhanov, Aqjar jáne Maǵjan Jumabaev aýdandarynyń keı jerlerinde normadan az jaýǵan. 2022 jylǵy 21 aqpanda jer qyrtysynyń qatý deńgeıi 62-151 sm boldy. Bul byltyrǵy mánderge jýyq. Tekserý qorytyndysy boıynsha aldaǵy sý tasqyny kezeńine negizgi gıdrologııalyq boljam jasalady», - deıdi Sáken Aǵzamov.
