SQO-da sý tasqyny bolýy múmkin 3 aýdanda qutqarýshylardyń jedel jasaǵy jumys istep jatyr
PETROPAVL. QazAqparat – Soltústik Qazaqstan oblysynda qutqarýshylar sý basý qaýpi bar úsh aýdanǵa baryp, jaǵdaıdy baqylaýda ustap otyr, dep habarlaıdy QazAqparat tilshisi.
Óńirlik kommýnıkatsııalar qyzmetinde SQO Tótenshe jaǵdaılar departamenti bastyǵynyń orynbasary Murat Qanǵojınov kóktemgi sý tasqyny boıynsha óńirde atqarylyp jatqan jumystardan qulaǵdar etti.
Oblysta sý basýy múmkin 85 eldi meken negizinen Aıyrtaý, Ǵ.Músirepov, Tımırıazev, Shalaqyn aýdandarynda ornalasqan. 6 myńnan astam adam turatyn 1872 úıge erigen qar sýy jáne tasqyn sý kirýi múmkin. Zardap shegýi yqtımal eldi mekender erekshe baqylaýǵa alyndy.
«Eki kún buryn oblystyń Ǵ.Músirepov, Aıyrtaý jáne Tımırıazev aýdandaryna 34 adam jáne 9 tehnıkadan quralǵan jedel jasaq jiberildi. Mamandar kólderdiń deńgeıine táýlik boıy monıtorıng júrgizedi, muzdy jaryp, usaqtaıdy. Sýdyń jolynda turǵan úıindilerdi nyǵaıtyp, erigen qar sýlaryn sorýmen aınalysady», - deıdi Murat Qanǵojınov.
SQO boıynsha gıdrometeorologııalyq jaǵdaı turaqty, qar erip, ózen-kólder sýy molaıyp jatyr. Mamandardyń aıtýynsha, ázirge jaǵdaı tynysh. Joldardy sý shaıý, qyzyl sýdyń turǵyn úılerge kirýi tirkelgen joq.
«Sý tasqynymen kúresýge quqyq qorǵaý organdarynan 475 adam, 134 tehnıkasy bar 8 top quryldy. Tabıǵat qubylysynyń zardabyn azaıtý maqsatynda jumystar júrgizilip jatyr. Byltyr eldi mekenderden 2 mln 095 tekshe metr qar shyǵarylsa, bıyl osy kúnge deıin 600 myń tekshe metr qar alyndy. 6 myńnan astam qubyr, 300 km aryqtar men sý ótkizý kanaldary tazartyldy. 265 reıd júrgizilip, 197 eldi mekenniń 35,5 myńnan astam turǵynymen kezdesý ótkizildi», - deıdi departament bastyǵynyń orynbasary.
Buǵan deıin SQO-daǵy shaǵyn ózende bir táýlikte sý deńgeıiniń jarty metrge deıin kóterilgenin aıtqan edik.
