SQO-da sý tasqyny bolǵan jaǵdaıda 2 myń adam, 1,3 myń tehnıka jumyldyrylady

PETROPAVL. QazAqparat – Soltústik Qazaqstan oblysynda kóktemgi sý tasqynyna daıyndyq barysy pysyqtaldy. Qyzyl sý eldi mekenderge qaýip tóndirgen jaǵdaıda onymen kúreske 2 myńǵa jýyq adam jáne 1,3 myń shamasynda tehnıka jumyldyrylmaq, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, sońǵy jyldary óńirde sý basý qaýpi bar 175 eldi mekende tıisti sharalar qolǵa alynyp, nátıjesinde olar sý basatyn aýyldar tiziminen alyndy.

130 km bolatyn problemaly ýchaskelerde jer úımeleri, 7 km qorǵanysh dambalary, óńirdiń avtojoldarynda 89 sý ótkizetin qubyr, 16 tıýbıng, 55 km astam jer asty arnalar júıesi salynyp, jóndeldi. Ózen arnalary tazartylyp, jaǵany bekitý jumystary júrgizildi.

Sý tasqynynan qaýip tóngen jaǵdaıda jergilikti atqarýshy organdar 1416 adam men 1180 tehnıkany shyǵarýǵa daıyn. Tasqyn sýdan zardap shekkenderdi kóshirýge 255 evakýatsııalyq pýnkt ázirlendi.

Budan basqa 114 júzý quraly, 15 myń tonnadan artyq ınertti materıal, 41 myń qap, 190 myń tonnaǵa jýyq janar-jaǵarmaı ázirlengen.

«Sý tasqynymen kúreske qutqarýshylar, Ulttyq ulan jáne polıtsııa qyzmetkerleri – 472 adam jáne 134 arnaıy tehnıka shyǵarylmaq.

Ótken jyldardyń tájirıbesin eskere otyra, departament kúshter men quraldar tobyn qurdy. Olar sý tasqyny bolýy múmkin ýchaskelerge aldyn ala 8 baǵyt boıynsha jiberiledi», - deıdi SQO TJD bastyǵy Ramıl Kamalov.