SQO-da sý tasqynynda baspanasyz qalǵan bir top turǵyn shıpajaıǵa attandy
PETROPAVL. KAZINFORM – Soltústik Qazaqstan oblysynda tasqyn sýdan zardap shekken turǵyndardyń bir toby búgin shıpajaıǵa demalýǵa attandy.
SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, alǵashqy 10 adam Şýchınskidegi shıpajaıǵa barýǵa jolǵa shyqty.
Qıyn jaǵdaıǵa tap bolǵan áleýmettik az qamtylǵan otbasylardyń múshelerine Eńbek jáne halyqty áleýmettik qorǵaý mınıstrligi men oblystyq kásipodaq ortalyǵy osylaısha qoldaý kórsetip otyr. Qazir óńirde sý tasqyny boıynsha jaǵdaı birshama turaqtalyp, turǵyndardyń aldy úılerine oralyp jatyr. Desek te basym bóligi týǵan-týystyń úıin jaǵalap, ýaqytsha turý pýnktin panalaýǵa májbúr.
«Búgin Şýchınskidegi shıpajaıǵa 10 adam jaıly kólikpen jolǵa shyqty. Olar mamyrdyń 10-y men 19-y aralyǵynda sonda bolady. Qazir shıpajaıda taǵy da bos oryndardyń bar-joǵy anyqtalyp jatyr. Soǵan qaraı sapar jalǵasyn tabady. Bizdiń qolymyzda zardap shekken adamdardyń tizimi bar. Habarlasyp, usynamyz. Úıi tehnıkalyq tekserýden ótip, shyǵyny baǵalanǵan turǵyndar barýǵa kelisimin berip jatyr», - deıdi SQO Jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Tatıana Bereskaıa.
Kelesi top 12 mamyrda Almaty qalasyndaǵy «Kóktem» shıpajaıyna barady. Turǵyndar demalys ornyna tizim boıynsha iriktelip alynǵan. Demalýshylarǵa aldyn ala eskertiledi.
«Otbasymyzben 2 qabatty úıdiń birinshi qabatynda turdyq. Tasqyn sý úıdiń shatyryna deıin jetti. Árıne, bizdi aldyn ala eskertip, evakýatsııalady. Biraq, dál mundaı jaǵdaı bolady dep kútpedik. Búgin shıpajaıǵa ketip baramyn. Osyndaı múmkindik berip, jaǵdaıymyzdy oılap jatqan jandarǵa alǵysym sheksiz. Bizge ózderi habarlasyp, shaqyrdy», - deıdi Petropavl turǵyny Olga Peters.
Barlyq shyǵyndy oblystyq kásipodaq ortalyǵy ótemek.
