SQO-da sý tasqynynan zardap shekken turǵyndarǵa arnalǵan 200 úıdiń qurylysy bastaldy
ASTANA. KAZINFORM - Soltústik Qazaqstan oblysynyń ákimi Ǵaýez Nurmuhambetov Premer-Mınıstr Oljas Bektenovke Memleket basshysynyń sý tasqynynan keıin turǵyn úılerdi, ınfraqurylymdy qalpyna keltirý jónindegi tapsyrmalaryn iske asyrý, sondaı-aq kóktemgi egis jumystaryna daıyndyq barysy týraly baıandady.
QR Úkimeti baspasóz qyzmetiniń habarlaýynsha, Soltústik Qazaqstan oblysynda ınfraqurylymdy qalpyna keltirý jáne sý tasqynynan zardap shekkenderge kómek kórsetý jumystary belsendi júrip jatyr. 4 myńǵa jýyq otbasyǵa jalpy somasy 1,5 mlrd teńgege 100 AEK mólsherinde birjolǵy materıaldyq kómek kórsetildi.
Azamattardyń baspana máselesin sheshý boıynsha sharalar kesheni qabyldanýda. Óńirde barlyǵy 3,8 myń úı sý astynda qalyp, onyń búgingi tańda 1,3 myńy tekserildi.
Petropavl qalasynyń «Solnechnyı-2» yqsham aýdanynda bekitilgen úsh joba boıynsha 500 turǵyn úı salynady. Tıisti memorandým jasalyp, qajetti ınjenerlik ınfraqurylym júrgizildi. Máselen, «Qazaqstan halqyna» qorynyń qarajatyna 100 úı salynyp jatyr. «Kazakhmys» korporatsııasy Qor arqyly taǵy 100 úı sala bastady. Іri paneldi qurylysqa mamandanǵan elordalyq «GLB úı qurylysy kombınaty» zaýyty «Kaspi» AQ qarajatyna 300 turǵyn úı salady.
SQO turǵyndaryna baspana satyp alý úshin jyljymaıtyn múliktiń bastapqy jáne qaıtalama naryqtary negizinde páterler pýly jasaqtaldy. Petropavlda alǵashqy 7 páter satyp alyndy, atalǵan jumys odan ári jalǵasady.
Oıqala yqsham aýdanynda jáne Bylǵary kentinde 26 úı men 7 páterge jóndeý jumystary júrgizilip jatyr.
Jalpy alǵanda, búginde yqsham aýdandar men aýyldarda jóndeý-qalpyna keltirý jumystaryn júrgizý úshin 800-den astam jumysshy men 400 tehnıka jumyldyrylǵan.
Sondaı-aq Ǵaýez Nurmuhambetov Premer-Mınıstrge óńirdiń egis naýqanyna tolyq daıyn ekendigin aıtty. Bıyl Soltústik Qazaqstan oblysynda 4,5 mln ga alqapqa egin egý josparda bar. Onyń ishinde 3,4 mln ga dándi daqyldarǵa, 751 myń ga maıly daqyldarǵa jáne 379 myń ga mal azyqtyq daqyldarǵa bólinedi. Azyq-túlik qaýipsizdigin qamtamasyz etý úshin SQO sharýalary qaraqumyq alqabyn 26 myń gektarǵa deıin, jasymyq alqabyn 133,9 myń gektarǵa deıin ulǵaıtady. Kartop egýge 26 myń ga jer bólinedi.
Tehnıka 100% daıyn. Bıyl Soltústik Qazaqstan oblysynyń alqaptaryna barlyǵy 12,7 myń traktor, 14 myń birlik astyq sepkish jáne 1,4 myń egis kesheni tartylady. Osy jyly óńir sharýalary 14 mlrd teńgege 525 tehnıka men qural satyp alyp, avtoparkti jańartty.
Soltústik Qazaqstan oblysynda kóktemgi dala jumystaryn qarjylandyrýǵa 62 mlrd teńge, onyń ishinde «Keń Dala» baǵdarlamasy boıynsha – 22 mlrd teńge, «Azyq-túlik korporatsııasy» AQ forvardtyq satyp alý baǵdarlamasy boıynsha – 14 mlrd teńge, «QazAgroQarjy» AQ jelisi boıynsha – 26 mlrd teńge qarastyrylǵan.
Úkimettiń sheshimi boıynsha oblys sharýalaryn qoldaýǵa qosymsha 84 mlrd teńge bólindi. Fermerlerge «Keń Dala – 2» baǵdarlamasy boıynsha, 5% paıyzdyq mólsherlememen jáne «Damý» qorynyń kepildigimen nesıe beriledi.
SQO ákimi Premer-Mınıstrge Memleket basshysynyń sapaly tyńaıtqyshtar óndirý jáne engizý esebinen ónimdilikti arttyrý boıynsha alǵa qoıǵan mindetterin oryndaý barysy týraly baıandady. Bıyl oblys sharýalary topyraqqa 256 myń tonna mıneraldy tyńaıtqysh engizýdi josparlap otyr, bul 2023 jyldaǵy kórsetkishpen salystyrǵanda 65,8 myń tonnaǵa artyq. Búgingi tańda 246,2 myń tonna tyńaıtqyshqa sharttar jasalyp, 204,6 myń tonnasy tıep-jóneltildi.
Úkimet basshysy Oljas Bektenov zardap shekken eldi mekenderdegi turǵyn úıler men ınfraqurylymdy qalpyna keltirý jumystaryn jedeldetýdi, sondaı-aq óńirde egis naýqanyn ýaqytyly ári sapaly júrgizý jóninde sharalar qabyldaýdy tapsyrdy.
