SQO-da sý tasqynynan qorǵaıtyn bógetter qaıta jańartylyp jatyr

ASTANA. KAZINFORM — Petropavl men qala mańyndaǵy aýdandardyń beriktigi taǵy da tekserildi. Byltyrǵy sý tasqynynyń barlyq sabaqtary eskerildi. Soltústik Qazaqstan oblysynyń ákimi Ǵaýez Nurmuhambetov Esildiń tasqyn sýlarynan qorǵaý sharalary týraly baıandady.

— Petropavl qalasyndaǵy 3 bógetti jáne Qyzyljar aýdanyndaǵy 3 bógetti qaıta jańartý jumystary aıaqtalyp keledi. Barlyq bógetterdiń bıiktigi Baltyq júıesi boıynsha 102,2 metrge deıin jetkizildi. Bul 2024 jylǵy sý tasqyny deńgeıinen 1,5 metrge joǵary. Jumystardy jyl sońyna deıin aıaqtaý josparlanyp otyr. Esil jaıylmasyndaǵy turǵyn úılerdi qorǵaý úshin 2 jer qorǵany salyndy, — dedi Ǵ. Nurmuhambetov elordada Ortalyq kommýnıkatsııalar qyzmetinde. 

Sonymen birge, Petropavl sý torabynan 32 shaqyrym tómen ýchaskede Esil arnasyn tazartý jáne túbin tereńdetý boıynsha jobalyq-smetalyq qujattama ázirlenip jatyr. 

— Bul bolashaqta ózenniń ótkizý qabiletin arttyrýǵa múmkindik beredi. Sý basý qaýpi joǵary aımaqtardyń biri – jaıylmada ornalasqan Zarechnyı kenti. Sondyqtan turǵyndardy qala ortalyǵyna tolyq kóshirý týraly sheshim qabyldandy. Alǵashqy 90 páterlik bes qabatty úıdiń qurylysy jaqynda aıaqtalady. Jyl sońyna deıin alǵashqy turǵyndardy jańa úıge qonystandyrý josparlanǵan, — dedi oblys ákimi. 

Buǵan deıin Ǵaýez Nurmuhambetov SQO-da qaıtarylǵan aktıvter qarajatyna jańa sý qubyry tartylǵanyn aıtqan edi. 

Sondaı-aq, Soltústik Qazaqstan oblysy 900 mlrd teńgege jýyq ınvestıtsııa tartqan.