SQO-da sý tasqynyna qarsy jumystar kúsheıtildi
ASTANA. KAZINFORM - Soltústik Qazaqstan oblysynda sý tasqyny kezeńine belsendi daıyndyq júrip jatyr. Oblys ákiminiń tóraǵalyǵymen ótken, aýdan ákimderi men profıldik vedomstvolar basshylary qatysqan aımaqtyq keńeste negizgi nazar is-qımyldardy úılestirýge jáne sý basý qaýpin azaıtý sharalaryna aýdaryldy, dep habarlaıdy QR Tótenshe jaǵdaılar mınıstrliginiń baspasóz qyzmeti.
Qyzyljar aýdanynda 7 gıdrologııalyq beket jumys istep, sý deńgeıine turaqty monıtorıng júrgizilip jatyr. Beskól jáne Prıbrejnoe aýyldarynda dambalardy qaıta jańǵyrtý jáne nyǵaıtý jumystary júrip jatyr, Teplıchnoe aýylynda jumystar aıaqtaldy. 13 eldi mekende jalpy uzyndyǵy shamamen 19 km bolatyn qorǵanys bilikteri turǵyzyldy, qosymsha eń osal ýchaskeler nyǵaıtylý ústinde.
Sonymen qatar ınfraqurylymdyq jobalar iske asyrylyp jatyr: Prıbrejnoe aýylyna aparatyn jol kópir ótkelimen birge qaıta jańǵyrtylyp, Zarechnyı kentinde jer biligi nyǵaıtylyp, aınalma kanal jańartyldy.
-Qabyldanǵan sharalar kesheni halyqtyń qaýipsizdigin qamtamasyz etýge jáne yqtımal sý tasqyny saldaryn azaıtýǵa baǵyttalǵan,-delingen habarlamada.
Osyǵan deıin ShQO-da sý tasqynyna daıyndyq qalaı júrip jatqany týraly jazdyq.