SQO-da sý tasqynyna baılanysty jeti eldi mekeni jaryqsyz qaldy

PETROPAVL. KAZINFORM – Soltústik Qazaqstan oblysynda qazirgi ýaqytta eki aýdannyń 253 turǵyny jáne 19 zańdy tulǵa elektr qýatynsyz otyr. 

«Soltústik-Qazaqstan Elektrjelistik Taratý Kompanııasy» AQ bas ınjeneri Aleksandr Elıseevtiń aıtýynsha, Shal aqyn aýdanynda «Marevka – Jańajol» joǵary voltty elektr taratý jelisinde 100-ge jýyq baǵan sý astynda qaldy. Taǵy 11-in qatty aǵys pen muz qulatty. Saldarynan 3 aýyl elektr qýatynan shekteldi. Qazirgi ýaqytta Jańa jol eldi mekeninde jaǵdaı durystaldy. Aýylǵa jyljymaly dızel generatorlar qoıyldy.

«Jańatalap pen Keńes aýyldarynda da jumys júrgizilip jatyr, jaqyn arada bul eki aýylǵa da jaryq beriledi.

Esil aýdanynda elektr baǵandarynyń sý astynda qalýyna baılanysty eki aýyl jaryqsyz otyr. Qazir munda avarııalyq-qalpyna keltirý brıgadalary – 3 tehnıkamen 11 maman jumys istep jatyr. Saǵat 16.00-ge deıin bul aýyldarǵa elektr qýaty beriledi.

Nıkolaevka eldi mekeninde Beregovaıa kóshesin sý basty, turǵyndar evakýatsııalandy, qaýipsizdik maqsatynda transformatorlyq podstantsııany sóndirýge týra keldi», - deıdi Aleksandr Elıseev.

Bas ınjenerdiń aıtýynsha, Esil aýdany Jarqaıyń aýylyna da sý jaqyndap, turǵyndary qaýipsiz jerge shyǵarylǵandyqtan, eldi meken qaýipsizdik maqsatynda elektr qýatynan ajyratyldy.

«Keshe 2 aýdannyń 7 eldi mekeni jaryqsyz qalǵan bolatyn. Qazir olardyń sany bireýge qysqardy. 
Mamandar qıyn jaǵdaıda jumys istep jatyr, joldardy sý shaıǵan, jetý qıyn.
Saǵat saıyn sý basqan, sý basý qaýpi bar aýmaqtarǵa monıtorıng júrgizilip jatyr. Biz búgin 24/7 rejıminde jumys istep jatyrmyz», - deıdi Aleksandr Elıseev.

Buǵan deıin SQO-da ótken táýlikte 5 eldi meken turǵyndary evakýatsııalanǵanyn aıtqan edik.

Sondaı-aq Petropavlda sý basý qaýpi bar «Qyzyljar sý» kásiporny bógetterdi nyǵaıtyp jatqanyn habarladyq.