SQO-da sý tasqynyna baılanysty UBT bıyl kesh ótkiziledi
PETROPAVL. KAZINFORM – Soltústik Qazaqstan oblysynda búgin UBT-ǵa qatysýǵa ótinishter qabyldaý bastaldy jáne basqa óńirlerge qaraǵanda 6 kúnge uzartylyp, 20 mamyrǵa deıin jalǵasady.
SQO Bilim basqarmasy baspasóz qyzmetiniń málimetinshe, testileýge qatysý úshin túlekter Ulttyq testileý ortalyǵynyń app.testcenter.kz saıtyndaǵy jeke kabınet arqyly onlaın ótinish beredi.
«6-13 mamyr aralyǵynda tek birinshi áreketke ótinish berýge bolady. 14 mamyrdan 20 mamyrǵa deıin 2-shi áreketke ótinish qabyldanady. Túlekter men ata-analar ótinish bergen kezde UBT tapsyrý kúnin, ýaqytyn jáne pýnktti ózi tańdaıdy. Jazǵy UBT-ǵa mektep túlekteri tegin qatysady», - deıdi SQO Bilim basqarmasynyń bas mamany Marııa Ismagambetova.
Mamannyń aıtýynsha, SQO úshin testileý jeke keste boıynsha júrgiziledi. Eger jalpy el boıynsha UBT 16 mamyrdan 5 shildege deıin ótse, munda 25 mamyrdan 12 shildege deıin josparlanǵan.
«Osy kezeńde túlekter testileýdi 2 ret tapsyra alady, eki sertıfıkat ta jaramdy jáne eń jaqsy nátıjemen granttar baıqaýyna qatysa alady. Bıylǵy UBT-nyń ereksheligi, jazǵy UBT-da tómen ball alǵan jaǵdaıda, qańtar nemese naýryz aılaryndaǵy UBT-nyń eń jaqsy nátıjesi eskeriledi», - deıdi Marııa Ismagambetova.
Bıyl SQO-da mektepti 3 myńnan astam túlek aıaqtaǵaly otyr. Buǵan deıin SQO-da 1,2 myń ga alqaptyń sý astynda jatqanyn aıtqan edik.
