SQO-da sý tasqynyna baılanysty «Kókshetaý-Omby» tas jolynyń ýchaskesi jabyldy

PETROPAVL. KAZINFORM – Soltústik Qazaqstan oblysynda erigen qar sýy Aqjar aýdany arqyly ótetin respýblıkalyq mańyzy bar «Kókshetaý-Omby» avtojolynyń ýchaskesin shaıyp ketti.

Bul týraly «Darmen» mobıldi qosymshasy habarlama taratty. 

«29 naýryz kúni saǵat 13.15 mınýt ketkende respýblıkalyq mańyzy bar «Kókshetaý-Omby» avtomobıl jolynyń 85-183 km ýchaskesi erigen qar sýy basýyna oraı jabyldy», - delingen.

SQO Tótenshe jaǵdaılar departamenti baspasóz qyzmetiniń málimetinshe, bul ýchaske Aqjar aýdanynda ornalasqan. Sý basqan aýmaqtyń uzyndyǵy ázirge 500 metr, tereńdigi – 40 sm. Sý áli kelip jatyr. Sol sebepti Chkalov eldi mekeninen Talshyq aýylyna deıin joldy jabýǵa týra kelgen. 

Mamandardyń aıtýynsha, jaqyn mańdaǵy eldi mekenderdi sý basý qaýpi joq. Qazir oqıǵa ornynda jergilikti atqarýshy bılik kezekshilik uıymdastyrǵan. 

Buǵan deıin SQO-daǵy Shaǵalaly ózeniniń sý deńgeıi bir táýlikte 1,5 metrge deıin kóterilgenin aıtqan edik.

Sanıtar dárigerler tasyǵan sý juqpaly aýrýlardyń taralýyna sebep bolatynyn eskertip jatyr.