SQO-da sý tasqynyna baılanysty aýyz sýdyń lastanǵany ras pa

PETROPAVL. KAZINFORM – Soltústik Qazaqstan oblysynda áleýmettik jeli arqyly óńirde sý lastandy, ony ishýge bolmaıdy degen aqparat tarap jatyr. Oblystyq sanıtarııalyq-epıdemıologııalyq baqylaý departamenti osyǵan baılanysty jaýap berdi.

SQO sanıtarııalyq-epıdemıologııalyq baqylaý departamenti basshysynyń orynbasary Tatıana Gorlovanyń aıtýynsha, áleýmettik jelide birer kúnnen beri júrgen bul aqparat shyndyqqa janaspaıdy. Epıdemıologııalyq jaǵdaı ýshyqpaý úshin qazirgi ýaqytta mamandar jaǵdaıdy baqylaýda ustap otyr.

«Qazirgi ýaqytta sanıtarlyq qyzmet 24/7 jumys rejımine kóshti. Synamalar alý úshin baqylaý oryndaryn kóbeıttik. QR bas sanıtar dárigeriniń 4 sáýir kúni shyqqan qaýlysyna saı sý basqan eldi mekenderge qatysty talaptar bekitildi. Ony sanıtar dárigerler ǵana emes, jergilikti atqarýshy bılik, sýmen qamtamasyz etýshiler de saqtaýy kerek.

ıAǵnı, eldi mekendi sý bassa, ol jerdegi sýdy paıdalanýǵa quqyqtary joq. Sýmen qamtýdyń basqa balama joldaryn izdestirý kerek. Qazirgi ýaqytta sý basqan Jańajol aýylynda ortalyq sý qubyry óshirilgen. Eldi mekenge sý jetkizý máselesi sheshilip jatyr. Mundaǵy eki qudyqtyń sýynan birneshe ret synama alyndy, qaýip joq.

Al óńirdi sýmen qamtyp otyrǵan kásiporyndar, máselen «Qyzyljar sý» mekemesiniń akredıttelgen zerthanasy bar, ıaǵnı qajetti zertteýdi ózderi júrgize alady. Munda kúnine sýdyń 32 synamasy bakterııaǵa, sanıtarlyq-hımııalyq quramyna tekseriledi. Sondyqtan krannan las sý aǵyp jatyr degen jalǵan», - deıdi Tatıana Gorlova.

Mamannyń aıtýynsha, turǵyndar qaýiptengen jaǵdaıda ishýge jáne tamaq daıyndaýǵa tek bótelkedegi nemese qaınatylǵan sýdy paıdalana alady.

«Óńirde sý tasqyny saldarynan sibir jarasynan ólgen maldar jatqan 4 qorym shaıylyp ketti. Ol jerlerden barlyq tıisti synama alynyp, sýdan eshqan qaýip anyqtalǵan joq. Sý ketkennen keıin biz topyraqtan synama alyp, aýrýdyń syrtqa shyqqan-shyqpaǵanyn zertteımiz. Jalpy oblysta mundaı 161 oryn bar jáne 8-9 sáýir kúnderi sýdyń 87 synamasy alynyp, zerthanaǵa jiberildi. Qazir 78-i áli de tekserilip jatyr. Alaıda daıyn bolǵan synamalardan adamǵa eshqandaı zııan bakterııalar tabylǵan joq. Kún saıyn sýdyń 50-60 synamasy tekserilip jatyr», - deıdi Tatıana Gorlova.

Buǵan deıin Petropavldaǵy sý basý qaýpi bar «Qyzyljar sý» kásipornynda bógetterdi nyǵaıtý jumysy júrip jatqanyn aıtqan edik.

«Qyzyljar sý» JShS atqarýshy dırektory Arman Saýytovtyń aıtýynsha, jaǵdaı baqylaýǵa alynǵan, maman dúrbeleńge salynbaı, tek resmı aqparatqa senýge shaqyrdy.