SQO-da sý tasqynymen kúresý úshin muz ústine ekskavatorlar shyǵaryldy
PETROPAVL. KAZINFORM – Soltústik Qazaqstan oblysynda ózenderdegi muz qursaýyn álsiretip, keptelis boldyrmaý úshin ekinshi ret jarý jumystary júrgiziledi. Sondaı-aq muzdy usaqtaýǵa ekskavatorlar da qoldanylyp jatyr.
SQO Tótenshe jaǵdaılar departamenti bastyǵynyń orynbasary Murat Qanǵojınovtyń aıtýynsha, shaǵyn ózenderde muz jarý jumystary Aqjar, Aıyrtaý, Ýálıhanov jáne Ǵ.Músirepov atyndaǵy aýdandarda júrgizildi.
«Aqjar aýdanyndaǵy Shat ózeninde muz qursaýyn álsiretý jáne keptelisti azaıtý úshin keshe jarý jumystary júrgizildi. Nátıjesinde sý deńgeıi túsip, jaqyn mańdaǵy úılerge sý kirýine jol bermedik. Jalpy bul aýdanda sý basý qaýpi bar tórt eldi meken bar. Bireýinde jaǵdaı turaqtaldy. Qazir Aşykól aýylyn baqylaýda ustap otyrmyz», - dedi Murat Qanǵojınov.
Departament bastyǵy orynbasarynyń aıtýynsha, qajet bolǵan jaǵdaıda ózenderde muz jarý jumystary qaıtalanady. Kompanııamen kelisim bar.
«Ózenderde jarý jumystarynan bólek muzdy usaqtaýǵa ekskavatorlardy da qoldanyp jatyrmyz.Mundaı tájirıbeni basqa óńirlerde de qoldanady», - dedi Murat Qanǵojınov.
Buǵan deıin Shat ózeni tasyp, turǵyndardyń qaýipsiz jerge shyǵarylǵanyn aıtqan edik.
Jalpy SQO-da sý tasqyny osy aptanyń sońynda sharyqtaý shegine jetedi degen boljam bar.
