SQO-da sý tasqyny jaǵdaıy baqylaýda: táýlik boıy kezekshilik engizildi
PETROPAVL. KAZINFORM — Tasqyn sýdy qaýipsiz qabyldaýdy jáne ótkizýdi qamtamasyz etý jónindegi jumystar sheńberinde «Qazsýshar» RMK Soltústik Qazaqstan fılıaly Sergeev jáne Petropavl sý qoımalaryn qosa alǵanda, óńirdiń sý sharýashylyǵy obektilerinde táýlik boıy kezekshilik uıymdastyrdy. Bul týraly vedomstvonyń baspasóz qyzmeti málim etti.
Ár tórt saǵat saıyn sý qoımalaryndaǵy sý kólemi men sý jiberý kórsetkishteri týraly málimetter óńdelip, múddeli memlekettik organdarǵa, sondaı-aq Reseı Federatsııasynyń Túmen oblysy boıynsha Tómengi Ob basseındik sý basqarmasyna joldanyp otyrady.
2026 jylǵy 1 sáýirdegi jaǵdaı boıynsha, Sergeev sý qoımasyndaǵy sý kólemi 706,1 mln tekshe metr. Qazirgi ýaqytta nysannan sekýndyna 32,8 tekshe metr kóleminde sý jiberilip jatyr. Bóget jotasy arqyly sýdyń asýy 8 santımetrdi qurap otyr. Sý tasqyny bastalǵaly beri sý qoımasyna 51 mln tekshe metr sý kelip túsken, onyń 9 mln tekshe metri jiberilgen.
Petropavl sý qoımasynda 2026 jylǵy 29 naýryzdan bastap sý deńgeıin retteý jumystary qaqpalardy basqarý arqyly júrgizilip, sý jiberý kólemi kezeń-kezeńimen ulǵaıtylyp jatyr. Jalpy alǵanda, óńirdegi sý tasqyny jaǵdaıy turaqty, Sergeev jáne Petropavl sý qoımalary qalypty rejımde jumys istep tur.
— Sergeev sý qoımasynyń tolýy — jyl saıyn qaıtalanatyn tabıǵı úderis. Nysan sý kólemi artqan jaǵdaıda artyq sýdyń bóget jotasy arqyly avtomatty túrde asýyna múmkindik beretindeı etip jobalanǵan. Bul sý qoımasynyń ózine de, mańyndaǵy eldi mekenderge de qaýip tóndirmeıdi. Sonymen qatar mundaı sý asýy kúzdiń sońyna deıin jalǵasýy múmkin. Oblystaǵy sý tasqyny jaǵdaıy Sý resýrstary jáne ırrıgatsııa mınıstrligi men basqa da jaýapty organdardyń turaqty baqylaýynda, — dedi «Qazsýshar» RMK Soltústik Qazaqstan fılıalynyń dırektory Erjan Kýsýmbaev.
Al el aýmaǵynda sý qoımalaryndaǵy qazirgi ahýal qandaı ekenin myna siltemeden oqyńyzdar.