SQO-da sý tasqyny jaǵdaıy áli de kúrdeli - TJD

ASTANA. KAZINFORM – Soltústik Qazaqstan oblysynda 1648 úıge sý kirdi jáne birneshe kúnde Esil ózenindegi sý deńgeıi tómendeıdi dep kútilýde. Bul týraly oblystyq TJD baspasóz hatshysy Evgenıı Jýravlev aıtyp berdi. 

«Qazirgi ýaqytta apatty joıý boıynsha jumystar júrgizilýde, Búgin Petropavl qalasyna aýyz sý beriledi. Ásirese eriktiler kóp kómek kórsetedi, aýyz sý basqa qalalardan da ákelinip jatyr. Keı jerlerde tehnıkalyq sý berildi. Petropavlda elektr jaryǵy bar», - dedi E. Jýravlev Respýblıkalyq aqparattyq shtabta ótken brıfıngte.

Onyń aıtýynsha, jalpy oblystaǵy jaǵdaı áli de kúrdeli bolyp qalýda.

«Sergeev sý qoımasy 159% tolyp, sý bóget sheginen 3 metr 10 sm asty. Táýlik ishinde 40 sm tómendeý baıqalady. Árıne, bul bir apta burynǵy kórsetkishterden aıtarlyqtaı tómen, ol kezde tirkelgen rekordtyq kórsetkish 4 metrden asqan edi. Birneshe kúnde Petropavl qalasynda sý azaıady dep kútilýde», - dedi spıker.

Qazirgi sátte oblysta 1648 úıdi jáne 1115 úı mańyndaǵy aýmaqtardy sý basqan.

Negizgi soqqy Qyzyljar aýdanynyń Teplıchnoe, Zaton, Prıbrejnoe kentterine keldi, onda 513 úıdi sý basyp, 2203 adam evakýatsııalandy.

«Petropavl qalasynyń Hromzavod jáne Oıqala shaǵyn aýdandarynda táýlik ishinde 1010 úıdi sý basty. Olardan 4552 adam evakýatsııalandy, olardyń 957-si bala. Kóshirilgen adamdar oblys ortalyǵynyń 3 orta mektebi men kolledjderdiń jataqhanalarynda jáne de basym bóligi týystarynda ornalastyryldy», - deıdi TJD ókili.

Esil ózeniniń mańyndaǵy eldi mekenderden kóshirilgender oblys ortalyǵy men aýdandardaǵy 19 evakýatsııa pýnktterine ornalastyryldy.

Jalpy oblys boıynsha 7354 adam evakýatsııalandy, olardyń 1840 bala. Táýlik ishinde 3684 adam evakýatsııalandy, olardyń 709-y bala. 44 adam úılerine oraldy.

Sonymen birge, 3 530 bas mal qaýipsiz jerlerge kóshirildi.