SQO-da sý tasqyny bastalǵaly 148 adam, sonyń ishinde 24 bala evakýatsııalandy

PETROPAVL. KAZINFORM – Soltústik Qazaqstan oblysynda besinshi kún qatarynan tasqyn sýmen kúres júrip jatyr.

SQO Tótenshe jaǵdaılar departamenti baspasóz qyzmetiniń málimetinshe, Qyzyljar aýdanynyń Teplıchnoe, Prıbrejnoe, Olshanka, Vagýlıno, Sokolovka, Bolshaıa Malyshka eldi mekenderi jáne Petropavldaǵy Zarechnyı kenti sý basý qaýpi joǵary aýmaqta tur. Úılerge sý kirgizbeý maqsatynda qutqarýshylar, polıtseıler, jergilikti atqarýshy organdar qyzmetkerleri, áskerı qyzmetshiler - 1500-den astam adam jáne 160 tehnıka, 22 júzý quraly jumyldyryldy. Sondaı-aq Astana qalasynan, Aqmola, Qostanaı oblystarynan, QR TJM 52859 áskerı bóliminen, Azamattyq qorǵaý akademııasynan qosymsha kómek keldi. Olar táýlik boıy qorǵanys qurylystaryn salý jáne nyǵaıtý úshin qapshyqtardy daıyndap, tósep jatyr. 

Prıbrejnoe aýyly men Petropavldaǵy Zarechnyı kentiniń turǵyndary qazir tek qaıyqtardyń kómegimen ǵana tasymaldanyp jatyr. 

Bolshaıa Malyshka aýylynda Esil ózeni sý deńgeıiniń kóterilýine baılanysty bóget jarylyp ketti. Eldi mekende 666 adam turatyn 254 úı bar, sý úılerge kirgen joq. Qazir sý shaıǵan jer qaıta jabylyp jatyr. 

Jalpy sý tasqyny bastalǵaly 148 adam, onyń ishinde 24 bala evakýatsııalandy, olar evakopýnktterge jáne týystaryna ornalasty. Sondaı-aq 81 bas iri qara mal qaýipsiz jerge shyǵaryldy. 

Buǵan deıin Bolshaıa Malyshka aýylynyń turǵyndary qaýipsiz jerge shyǵaryla bastaǵanyn jazǵan edik.