SQO-da sý tasyǵan aýmaqta balyq aýlaǵan 12 adam jaýapqa tartyldy
PETROPAVL. KAZINFORM – Soltústik Qazaqstan oblysynda tabıǵatty qorǵaý polıtsııasynyń qyzmetkerleri men oblysaralyq Esil basseındik ınspektsııasynyń ınspektorlary birlesken reıd ótkizip jatyr. Óıtkeni sáýirdiń 15-nen maýsymnyń 1-i aralyǵynda ýyldyryq shashýǵa baılanysty balyq aýlaýǵa tyıym salynǵan.
Tasyǵan sý balyqty ońaı oljaǵa aınaldyrdy. Bul keı adamdardy qyzyqtyrmaı qoımasy anyq. SQO polıtsııa departamenti baspasóz qyzmetiniń málimetinshe, Aıyrtaý aýdany tabıǵatty qorǵaý polıtsııasynyń qyzmetkerleri men oblysaralyq Esil basseındik ınspektsııasynyń ınspektorlarymen reıd júrgizip, balyq aýlaýdyń qyzyǵyna túsken 12 jergilikti turǵyndy anyqtady. Talapty buzǵandar ákimshilik jaýapkershilikke tartyldy.
«Osyndaı reıdtik is-sharalar basqa aýdandarda da júrgizip jatyr. Ýyldyryq shashý kezeńinde balyq aýlaý da tabıǵı resýrstardy qalpyna keltirýge zııan keltiretinin este saqtaýyńyzdy suraımyz", - deıdi SQO PD jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.
Tabıǵatty qorǵaý polıtseıleri ańshylarǵa 27 sáýirden 11 mamyrǵa deıin oblys aýmaǵynda Qazaqstan Respýblıkasynyń Qyzyl kitabyna engen túrlerden basqa, jabaıy úırekterdiń atalyqtaryna kóktemgi ań aýlaý maýsymy ashylatynyn eske salady.
Ań aýlaý úshin ilespe qujattardyń bolýy shart. Rezervtik qordyń ańshylyq alqaptarynda, qazdardyń barlyq túrlerine, sondaı-aq analyq jabaıy úırekter men analyq qurdy atýǵa tyıym salynady.
