SQO-da sý shaıyp ketken kópir qyrkúıek aıynda paıdalanýǵa beriledi
PETROPAVL. QazAqparat - Bıyl Soltústik Qazaqstan oblysynda Aqan-Burlyq ózenindegi kópir qoldanysqa beriledi, dep habarlaıdy QazAqparat «QazAvtoJol» kompanııasyna silteme jasap.
«Respýblıkalyq mańyzy bar M-36 «Ekaterınbýrg-Almaty» avtojolynyń 835 shaqyrymynda jóndeý jumystary qarqyndy júrip jatyr. Qazirgi tańda Aqan-Burlyq ózeni arqyly ótetin kólik kópiri tolyǵymen jańartylýda. Jobanynyń bas merdigeri «Kazahdorstroı» jaýapkershiligi shekteýli seriktestigi», delingen habarlamada.
Kompanııanyń málimetinshe, kúrdeli jóndeý jumystary aıasynda jol jóndeýshiler kópirdiń tósemin keńeıtý úshin arqalyqtardy aýystyryp, tirekterdi qalpyna keltirýi qajet. Mamandar aralyq tirekterdi ornatyp jatyr. Tegisteıtin qabatty ornatý jumystary oryndaldy, tómengi tordy baılaý jumystary bastaldy. Kópir jumysyna 19 qurylys tehnıkasy jumyldyrylyp, 41 adam jumys isteýde.
Kúrdeli jóndeý jumystary keste boıynsha júrýde. Jańa avtomobıl kópiri 2019 jyldyń qyrkúıek aıynda ashylady dep josparlanǵan.
Eske sala ketsek, Soltústik Qazaqstan oblysynyń Ǵ.Músirepov atyndaǵy aýdanynda ornalasqan atalmysh kópirdi 2 sáýirde tasqyn kezinde sý shaıyp ketken bolatyn.
