SQO-da sý qubyry ınfraqurylymyn damytýǵa 45 mlrd teńgeden astam qarjy bólindi

ASTANA. KAZINFORM – Qazaqstan Úkimeti Memleket basshysynyń elge qaıtarylǵan zańsyz ıemdenilgen aktıvter qarajaty esebinen áleýmettik ınfraqurylym nysandaryn salý jónindegi tapsyrmalaryn júzege asyrýdy jalǵastyrýda.

Arnaýly memlekettik qordan Soltústik Qazaqstan oblysynyń aýyl turǵyndaryn sapaly aýyz sýmen qamtamasyz etý maqsatynda sý qubyry ınfraqurylymyn damytýǵa 45 mlrd teńgeden astam qarajat bólindi.

- Bul qarajat esebinen óńirdiń sýmen jabdyqtaý júıesin jaqsartýǵa baǵyttalǵan 48 joba júzege asyrylady. Olardyń qatarynda Sokolov, Býlaev jáne Presnov toptyq sý qubyrlaryn rekonstrýktsııalaý, sondaı-aq Aıyrtaý jáne Shal aqyn aýdandaryndaǵy aýyldarda Kókshetaý toptyq sý qubyryna qosylatyn jańa sý qubyrlary men sý tartý tarmaqtaryn salý jobalary bar, - dep jazdy Úkimetten.

Soltústik Qazaqstan oblysyndaǵy aýyldarda barlyq jumys aıaqtalǵannan keıin halyq sapaly aýyz sýmen 100% qamtamasyz etiledi.

Qazirgi tańda elimizdegi eń uzyn toptyq sý qubyrlary Soltústik Qazaqstan oblysynda ornalasqan. Olardyń jalpy uzyndyǵy 3 myń shaqyrymnan asady. Osy qubyrlar arqyly 175 myńnan astam turǵyny bar 229 aýyl aýyz sýmen qamtylyp otyr. Petropavl qalasynyń turǵyndary 100%, al aýyldardaǵy halyq 97,5% sýmen jabdyqtaý qyzmetine qol jetkizgen.

Aıta keteıik, Jambyl oblysynda Jańaótkel aýyly taza aýyz sýmen qamtamasyz etildi.