SQO-da sý qoımalaryna tuqy balyǵynyń bir mln shabaǵy jiberilmek
Bıyl kúzde Petropavl jáne Sergeev sý qoımalaryna tuqy balyǵynyń 1 mln dana shabaǵy jiberilmek. Maýsym aıynan qyrkúıekke deıin jasandy kólderde ósirilgen olardyń eń kishkentaıynyń salmaǵy shamamen 12 gramm. Mamandar shabaqtardyń durys jetilýi úshin kúndelikti sýdy tazartyp, tamaqtandyryp, ottegi kólemin nazarda ustap otyrdy. Endi tórt aı jumystyń nátıjesi – balyqtar óńirdiń eki sý qoımasyna jiberilmek.
Mamannyń aıtýynsha, bir shelekte shamamen 700-den astam shabaq bolady. Al árqaısysynyń ortasha salmaǵy komıssııa músheleriniń qatysýymen, arnaıy ólsheý ádisimen anyqtalady.
«Komıssııa shabaqtyń tehnıkalyq sıpattamaǵa sáıkestigin anyqtaıdy, árqaısysynyń salmaǵy 12 gramnan kem bolmaýy tıis. Búgingi kórsetkishi jaqsy, tıisti mólsherden joǵary boldy. Aldymen Sergeev sý qoımasyn balyqtandyramyz. Bıyl kúzde oǵan tuqy shabaǵynyń 579 150 danasy jiberilmek», - deıdi Esil oblysaralyq basseındik balyq sharýashylyǵy ınspektsııasy» RMM basshysynyń orynbasary Marat Esimseıitov.
Sý qoımalaryn balyqtandyrý jumystary shamamen 10 kúnge jalǵaspaq.
