SQO-da sý qoımalary ottegimen baıytylyp jatyr

PETROPAVL. QazAqparat – Soltústik Qazaqstan oblysynda mamandar sý qoımalaryndaǵy balyqtardy qyrylýdan saqtaý úshin kólderdi ottegimen baıytyp jatyr, dep habarlaıdy QazAqparat tilshisi.

Óńirde bıyl qys qatty aıazymen qyspasa da, kólderdegi muzdyń qalyńdyǵy 70-80 sm jetken. Al, bul – taıaz kólderdi mekendeıtin balyqtar úshin qaýipti. Otteginiń jetpeýinen qyrylyp qalýlary múmkin. Sol sebepti jylda osy ýaqytta kólderdi jalǵa alýshylar, tabıǵatty qorǵaýshylar jáne jergilikti atqarýshy bılik ókilderi aeratsııa jumystaryn qolǵa alady. ıAǵnı sý qoımalaryn qoldan ottegimen baıytady.

SQO-da balyq sharýashylyǵymen aınalysýǵa bolatyn 500-den astam kól bar. Onyń 302-si jalǵa berilse, 199-y ázirge ıesiz, rezervtik qorda tur. Solardyń biri Qyzyljar aýdany Vınogradov aýyldyq okrýgindegi Sıvkovo kóli. Bul kólde 20 shaqty adam melıoratıvti jumystardy júrgizip jatyr.

«178 ga aýmaqty alyp jatyr, tereńdigi 2 metrge jetpeıdi. Muzdyń qalyńdyǵy 70-80 sm. Sáıkesinshe sý tek 1 metrdi ǵana alyp jatyr. Al bul mundaǵy balyqtarǵa qaýipti, tunshyǵyp, qyrylyp qalýy múmkin. Bir myńǵa jýyq oıyq jasaýdy josparlap otyrmyz. Munda móńke balyǵy tirshilik etedi», - deıdi Sokolov orman sharýashylyǵynyń mamany Sergeı Brıýhov.

Jumysshylar muz ústinde oıyqtar jasap, oǵan qamys salady. Bul oıyqtardyń tez qatyp qalmaýy úshin qajet. Sondaı-aq motopompalar arqyly sý ottegimen baıytylady.

«Bul jalǵa berilmegen rezervte turǵan sý qoımasy. Sondyqtan munda kólderdi ottegimen baıytý jumystaryn jergilikti atqarýshy bılik ókilderi uıymdastyrady. Qazir mundaı sharalar 30-dan astam kólde júrgizilip jatyr. Mysaly, myna kólde ótken joly 700 tekshe metr sý shaıyldy», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bólim basshysy Mıhaıl Nıkıtın.

Aeratsııa jumystary óńir kólderinde naýryz aıynyń basyna deıin jalǵaspaq.