SQO-da sý ketken aýmaqtar dezınfektsııalanyp jatyr
PETROPAVL. KAZINFORM – Soltústik Qazaqstan oblysynda sý tasqynynan 3,5 myńǵa jýyq baspana sý astynda qaldy. Qazirgi ýaqytta olardyń 196-synan sý ketti. Osyǵan oraı dezınfektsııalyq jumys júrgizilip jatyr.
«Ulttyq saraptama ortalyǵy» RMK «Soltústik Qazaqstan oblysy boıynsha dezınfektsııa ortalyǵy» fılıaly dırektorynyń mindetin atqarýshy Juldyzbek Jamantaevtyń aıtýynsha, ortalyq mamandary 22 sáýirden bastap bul jumysqa kirisip ketti. Dezınfektsııany 4 mamannan quralǵan brıgada atqarady. Qazirgi ýaqytta olar Taıynsha aýdanynda jumys istep jatyr. Búginge deıin mundaǵy 21 úıdiń 18-i zararsyzdandyryldy.
«Sý basqan aýmaqty dezınfektsııalaýdaǵy maqsat – turǵyndardyń arasynda juqpaly ınfektsııalyq aýrýlardyń taralýyna jol bermeý. Sondyqtan sý basqan úıler, olardyń aýmaǵy, aýla, balalardyń oıyn alańy, qudyqtar men uǵymalardyń aınalasy zararsyzdandyrylady. Úıdiń ishine kirip, mindetti túrde qabyrǵalaryn, eden-esikterin, ydys-aıaqty, tósek-oryndy, tipti oıynshyqtarǵa deıin óńdeımiz. Sonyń ishinde jıhazdardy, qabyrǵalar men edenderdi súrtip, ne bolmasa shashý arqyly dezınfektsııalasaq, ydys-aıaq, oıynshyqtar, kórpe-jastyq tystary, jamylǵylar arnaıy eritindige salynady», - deıdi Juldyzbek Jamantaev.
Mamandar dezınfektsııa úshin quramynda hlory bar kez kelgen - «Dezekonom», hloramın, sýlfohlorantın, Dezhlor, «DP Altaı» sııaqty preparattardy qoldanady.
«Dezınfektsııalyq jumys sý ketken úılerge júrgiziledi. Ázirge óńirde sý tasqynynyń ekinshi tolqyny júrip jatyr. Sondyqtan negizgi jumys alda», - deıdi Juldyzbek Jamantaev.
Buǵan deıin SQO-da «Qazaqstan halqyna» qorynyń 100 turǵyn úı salýǵa 10 mlrd teńge bólip, oblystyq ákimdikpen memorandýmǵa otyrǵanyn aıtqan edik.
