SQO-da sý basý qaýpi bar aýyl turǵyndary basqa jerge kóshirildi
PETROPAVL. QazAqparat - SQO-nyń Ýálıhanov aýdanyndaǵy sý basý qaýpi bar Qaratal aýylynyń turǵyndary qaýipsiz jerge kóshirildi, dep habarlaıdy QazAqparat tilshisi.
SQO ákiminiń baspasóz qyzmetiniń habarlaýynsha, Qaratal aýylynyń turǵyndary evakýatsııalyq beket - Qýlykól aýylyndaǵy mektepke ýaqytsha ornalastyryldy.
Búgingi tańda Qýlykól men Qaratal arasyn jalǵastyratyn joldy sý shaıyp ketti. Aýyl turǵyndarynyń aıtýynsha, tótenshe jaǵdaı bul aýyldarda sońǵy ret osydan 5 jyl buryn bolypty. Ol kezde qyzyl sý tolyǵymen aýylǵa kirgen eken.
Oblys ákimi Qumar Aqsaqalov úshinshi kún sý tasqyny bolýy múmkin qaýipti aýmaqta júr. Óńir basshysynyń jetekshiligimen qurylǵan arnaıy shtab apatty boldyrmaý úshin tıisti jumystardy júrgizip jatyr. Qumar Іrgebaıuly barlyq qyzmetterdiń jetekshilerimen jınalys ótkizip, jaǵdaı baqylaýda ekenin jetkizdi.
«Tıisti qyzmettermen birge barlyq qajetti is-sharalardy júzege asyryp jatyrmyz. Búgingi kúni osy eki aýyldyń turǵyndaryna eshqandaı qaýip joq. Eki kún boıy Sileti sý qoımasynan sekýndasyna 574 tekshe metr sý ketip jatyr. Biraq ta búginnen bastap, sýdyń sál ǵana tómendeýin kórip otyrmyz. Barlyq qajet etinin sharalardy qoldanyp jatyrmyz», - dedi oblys ákimi Qumar Aqsaqalov.
Óńir basshysynyń aıtýynsha, turǵyndardyń ómiri men densaýlyǵyna, mal-múlkine keler qaýip joq. Jaǵdaı tolyq baqylaýda.
