SQO-da stalkıng deregi boıynsha alǵashqy úkim shyqty

PETROPAVL. KAZINFORM — Soltústik Qazaqstan oblysynda polıtsııa Qazaqstan Respýblıkasy Qylmystyq kodeksiniń jańa baby — «Stalkıng» boıynsha tergeýdi aıaqtady. Eldegi qýdalaý faktisi boıynsha alǵashqy úkimdi Petropavl qalalyq soty shyǵardy. 

SQO Polıtsııa departamenti baspasóz qyzmetiniń málimetinshe, áıeldiń aryzyna sáıkes, oǵan bir jarym jyldan astam ýaqyt boıy 37 jastaǵy qala turǵyny maza bermegen. Er adam artynan qalmaı, ony únemi baqylaýda ustap, kóńil bólýin talap etken, áıelmen jáne onyń jaqyndarymen janjaldasqan.

Buǵan deıin de er adam jábirlenýshini jaraqattap, balaǵattaǵany úshin sondaı-aq onyń tanysyna shabýyl jasaǵany úshin ákimshilik jáne qylmystyq jaýapkershilikke tartylǵan. Alaıda, soǵan qaramastan, ol qýdalaýdy toqtatpaǵan. Jábirlenýshi qala ishinde emin-erkin júrýden qalyp, basqa adamdarmen qarym-qatynas jasaýdan qorqatyn bolǵan.

2025 jyldyń qyrkúıeginen bastap Qazaqstanda Qylmystyq kodekstiń 115-1-baby «Stalkıng» kúshine engennen keıin de er adam jábirlenýshimen eki ret baılanys ornatýǵa árekettenedi. Sonyń biri podezdegi beınebaqylaý kamerasyna túsip qalǵan.

Áıel 22 qańtar kúni polıtsııaǵa aryzdandy. Quqyq qorǵaý organdary qysqa merzimde tergeý júrgizip, materıaldardy sotqa joldady. 28 qańtarda sot aıyptalýshyǵa úkim shyǵaryp, 100 saǵat qoǵamdyq jumy túrinde jaza kesti. Sonymen qatar, oǵan alkogoldik ishimdik ishýge tyıym salynyp, profılaktıkalyq áńgimelesý úshin polıtsııaǵa turaqty túrde kelý mindetteldi jáne jábirlenýshimen kez kelgen baılanys ornatýyna qatań tyıym salyndy. Úkim zańdy kúshine engen joq.

SQO polıtsııa departamentiniń qoǵamdyq qaýipsizdik basqarmasynyń málimetinshe, qańtar aıynda oblysta stalkıngtiń eki faktisi tirkelgen, ekinshisi boıynsha qazirgi ýaqytta sotqa deıingi tergeý júrgizilip jatyr.

Buǵan deıin Semeıde qyzǵa stalkıng jasaǵan er adamǵa qatysty qylmystyq is qozǵalǵanyn jazǵan edik.