SQO-da sirke qyshqylyn ishken ákimdik qyzmetkeri eki aptadan keıin qaıtys boldy
PETROPAVL. KAZINFORM — Soltústik Qazaqstan oblysy Maǵjan Jumabaev aýdany ákimdiginiń qyzmetkeri aýrýhanada qaıtys boldy.
1964 jyly týǵan áıeldiń ómirin saqtap qalý úshin dárigerler eki aptaǵa jýyq kúresti. Alaıda medıtsına mamandarynyń barlyq kúsh-jigerine qaramastan, 15 qarashada jansaqtaý bóliminde naýqas kóz jumdy.
SQO polıtsııa departamenti baspasóz qyzmetiniń málimetinshe, oqıǵa 3 qarashada bolǵan. Aýdan ákimdiginde statıst bolyp jumys istegen 62 jastaǵy áıel jumys ornynan aýyr hımııalyq ýlaný belgilerimen aýrýhanaǵa jetkizildi. Ol dárigerlerdiń baqylaýynda boldy.
Osy fakti boıynsha SQO polıtsııa departamenti QR Qylmystyq kodeksiniń 105-babynyń 1-bóligimen sotqa deıingi tergeý amaldaryn júrgizip jatyr.
— Quqyq qorǵaý organdary bolǵan jaǵdaıdyń mán-jaıyn anyqtaıdy. Zań talaptaryna sáıkes, tergeý múddesine baılanysty ózge aqparat ázirge jarııa etilmeıdi, — dep habarlady vedomstvonyń baspasóz qyzmetinen.
Áleýmettik jelilerde oqıǵanyń aýdan ákimdiginde júrgizilýi múmkin qarjylyq tekserispen baılanysy týraly boljamdar taraǵan. Alaıda ázirge bul aqparat resmı túrde rastalǵan joq.
Buǵan deıin Ál-Farabı atyndaǵy Qazaq ulttyq ýnıversıtetiniń geografııa jáne tabıǵatty paıdalaný fakýltetinde oqyǵan birinshi kýrs stýdenti mert bolǵanyn jazǵan edik.