SQO-da sportshylarǵa arnalǵan ońaltý ortalyqtary joq
PETROPAVL. KAZINFORM – Soltústik Qazaqstan oblysynyń sportshylary respýblıkalyq jáne halyqaralyq jarystarda el namysyn qorǵap júr. Alaıda joǵary nátıjeniń artynda kóp jaǵdaıda aıtyla bermeıtin másele bar. Ol - sportshylardy qalpyna keltirý jáne ońaltý júıesiniń álsizdigi.
SQO dene shynyqtyrý jáne sport basqarmasynyń málimetinshe, qazirgi ýaqytta óńirde sportshylarǵa arnalǵan mamandandyrylǵan qalpyna keltirý jáne ońaltý ortalyqtary, sondaı-aq saýyqtyrý bazalary joq. Bul - jaraqat alǵan nemese aýyr jarystardan keıin qalypqa kelýi qajet sportshylar úshin úlken másele.
Mamandardyń aıtýynsha, sporttaǵy nátıje tek jattyǵýmen ǵana emes, durys qalpyna kelýmen de tikeleı baılanysty. Alaıda óńirde bul baǵyt áli tolyq jolǵa qoıylmaǵan. Al sapaly ońaltý bolmaǵan jaǵdaıda jaraqat sany artyp, sporttyq mansap qysqarýy múmkin.
- Qazirgi ýaqytta oblys aýmaǵynda jarystardan keıin sportshylardyń densaýlyǵyn qalpyna keltirýge arnalǵan arnaıy baǵdarlamalar men jeke júıeler qarastyrylmaǵan. Búginde oblysta dárigerlik-dene shynyqtyrý dıspanserin ashý máselesi qarastyrylyp jatyr. Qazirgi tańda bul bastama sportshylardyń qajettilikteri men óńirdiń medıtsınalyq ınfraqurylymyn eskere otyryp pysyqtalý ústinde. Degenmen bul jobanyń naqty merzimi týraly aıtýǵa áli erte, - deıdi SQO dene shynyqtyrý jáne sport basqarmasynyń basshysy Qarlyǵash Ramazanova.
Qazir Qazaqstan quramasyna kiretin sportshylar ǵana jylyna bir ret tereńdetilgen medıtsınalyq tekserýden ótedi. Al jarystan keıingi ońaltý kóbine jattyqtyrýshynyń raporty negizinde uıymdastyrylatyn qalpyna keltirý oqý-jattyǵý jıyndarymen shekteledi.
Ótken jáne bıylǵy jyly osy maqsatqa oblystyq bıýdjetten shamamen 8 mln teńge bólingen. Alaıda mamandandyrylǵan ortalyqtar joq jaǵdaıda bul qarjynyń jetkiliktiligi de kúmán týdyrady.
- Qazir jattyǵý júıesinde jarystardan keıin sportshynyń qalpyna kelýine arnalǵan ótpeli kezeń qarastyrylǵan. Sondaı-aq, sport uıymdarynda qalpyna keltirý oqý-jattyǵý jıyndary ótkiziledi. Mundaı jıyndar jaraqattan keıin sportshylardy júktemege birtindep qaıta beıimdeý maqsatynda, densaýlyq jaǵdaıyna sáıkes jattyǵý protsesin mindetti túrde beıimdeı otyryp ótkiziledi. Al, jalpy, qolda bar aqparatqa sáıkes, ótken jyly jáne bıyl qarastyrylyp otyrǵan baǵyt aıasynda sportshylarǵa ońaltý nemese saýyqtyrý boıynsha jeke kómek kórsetý jaǵdaılary tirkelmedi, - deıdi Qarlyǵash Ramazanova.
Buǵan deıin Almatyda jańa dene shynyqtyrý-saýyqtyrý keshenin salý kózdelgenin jazǵan edik.
