SQO-da sport qyzmetkerleri marapattaldy
PETROPAVL. QazAqparat – Soltústik Qazaqstan oblysynda Sport kúni qarsańynda 20-dan astam sala qyzmetkeri túrli marapatqa ıe boldy, dep habarlaıdy QazAqparat tilshisi.
Tamyzdyń ár úshinshi jeksenbisi sport salasy qyzmetkerleri kásibı merekelerin atap ótedi.
SQO Dene shynyqtyrý jáne sport basqarmasy baspasóz qyzmetiniń málimetinshe, óńirde búginde 176 myń adam nemese turǵyndardyń úshten biri sportpen turaqty túrde aınalysyp, salamatty ómir saltyn ustanady. Sport nysandary qoljetimdi bolýy úshin jyl saıyn eldimekenderde dene shynyqtyrý-saýyqtyrý keshenderi salynyp, paıdalanýǵa berilip jatyr. Byltyr eki aýdan ortalyǵynda ashylsa, bıyl alty aýdanda osyndaı keshenderdiń qurylysy júrip jatyr.
«Bul maqsatqa 3 mlrd teńge bólindi. Qarjy ótken jylmen salystyrǵanda 6 ese kóp. Jańa stadıondardyń, dene shynyqtyrý-saýyqtyrý keshenderiniń ashylýy turǵyndardy, jastardy sportpen aınalysýǵa yntalandyrady», - deıdi SQO Dene shynyqtyrý jáne sport basqarmasynyń basshysy Sergeı Melehov.
Sport kúni qarsańynda osy salada qajyrly eńbek etip júrgen mamandardyń eńbegi baǵalandy. Onyń ishinde Qazaqstannyń Qurmetti sport qaıratkeri, SQO-nyń qurmetti azamaty Jambyl Tasemenov ta bar. Sport salasynyń ardageri 10 tamyz kúni 75 jasqa tolǵan edi. Ol - oblystyq sportta daryndy balalarǵa mamandandyrylǵan mektep-ınternatynyń negizin qalaǵan, kóptegen tanymal sportshynyń jattyqtyrýshysy. Búgin ardager QR Mádenıet jáne sport mınıstrligi Sport jáne dene shynyqtyrý isteri komıtetiniń Qurmet gramotasymen marapattaldy.
«Túrli deńgeıdegi jarystarda el abyroıyn asqaqtatyp júrgen soltústikqazaqstandyqtar jeterlik. Olar: Aleksandr Vınokýrov, Janat Jaqııanov, Alekseı Lýtsenko, Margarıta Mýkasheva, Mıhaıl Lıtvın, Nurqoja Qaıpanov jáne taǵy basqalary. Oblysta ulttyq sport túrleri de jaqsy damyp keledi. Óńir basshysynyń tikeleı qoldaýynyń arqasynda «Qyzyljar arlandary» sport klýby quryldy. Olar eki-úsh jyldyń ishinde eki ret el chempıonatynda sátti óner kórsetip, úshinshi orynnan kórindi. Al jerles balýan Qýanysh Ysqaqov eki dúrkin qazaq kúresinen álem chempıony atandy», - deıdi Sergeı Melehov.
Sport salasynyń 23 qyzmetkeri kásibı mereke qarsańynda SQO ákiminiń Qurmet gramotasymen, Alǵys hatymen, mınıstrliktiń Qurmet gramotasymen, Alǵys hattarymen marapattaldy.
