SQO-da sottalǵandarǵa kómek kórsetetin JI keńesshi iske qosylmaq
PETROPAVL. KAZINFORM – Soltústik Qazaqstan oblysynda jasandy ıntellektini qoldanyp, sottalǵandarǵa arnalǵan quqyqtyq keńesshi ázirlenetin bolady.
Áleýmettik mańyzy zor jobany jergilikti ýnıversıtet ázirleıdi. Jobanyń negizgi maqsaty – qylmystyq-atqarý júıesi mekemelerinde otyrǵandardyń quqyqtyq aqparatqa teń ári qaýipsiz qoljetimdiligin qamtamasyz etý. Bul bastama sottalǵandardyń quqyqtyq saýatyn arttyrýǵa jáne olardyń zańdy múmkindikterin tıimdi paıdalanýyna jaǵdaı jasaýǵa baǵyttalǵan. Osyǵan oraı Qozybaev ýnıversıteti men Soilephone kásiporny yntymaqtastyq týraly kelisimge qol qoıdy.
Buǵan deıin kompanııa QAJ mekemelerinde qaýipsiz baılanys ornatýǵa arnalǵan beınetaksofon platformasyn ázirlep, engizgen. Beınetaksofondar sottalǵandardyń týystarymen jáne zańdy ókilderimen baılanys ornatýǵa múmkindik berdi.
Endi jańa joba nátıjesinde sottalǵandar beınetaksofondar kómegimen quqyqtyq aqparatqa qol jetkizip, zańnama normalarynyń túsindirmesin beıimdelgen ári túsinikti formatta ala alady. Bul, jobany ázirleýshilerdiń aıtýynsha, quqyqtyq daýlar men ishki qaqtyǵystardyń azaıýyna yqpal etedi.
JI keńesshisi qylmystyq zańnama, qylmystyq-atqarý, azamattyq, ákimshilik zańnamalar boıynsha aqparat beredi jáne zańdy ókildiksiz paıdalanýǵa bolatyn ótinish úlgilerin usynady.
Sonymen qatar, júıe shaǵymdar men ótinishter berý tártibi, shartty túrde merziminen buryn bosaý, basqa ustaý sharttaryna aýystyrý, kezdesýler men habarlamalar alý tártibi týraly túsindiredi.
Ýnıversıtet rektory Erbol Isaqaevtyń aıtýynsha, bul joba sottalǵandarǵa naqty kómek kórsetýdi maqsat etedi. Joǵary oqý orny bıyl óńir kásiporyndarymen birlesip, jeti jobany kommertsııalandyrýǵa usynǵan. Mundaı seriktestik óndiristik kompanııalarǵa qýatty arttyrýǵa jáne ǵylymı ıdeıalardy tájirıbege engizýge múmkindik beredi.
Al, jobany iske asyrý barysynda normatıvtik bazaǵa taldaý júrgiziledi, sáýleti jobalanady, sondaı-aq QAJ mekemeleriniń birinde pılottyq joba iske qosylady.
Buǵan deıin SQO-da túzeý mekemesiniń bastyǵy ustalǵanyn UQK rastaǵanyn jazǵan edik.