SQO-da sottalǵandar arasynda sándik-qoldanbaly óner buıymdarynyń baıqaýy ótti
ASTANA. KAZINFORM - Petropavl qalasyndaǵy «Botaı» kórkemsýret galereıasynda sottalǵandar arasynda «Úmit–2026» kartınalar men sándik-qoldanbaly óner buıymdarynyń baıqaýy ótti, — dep jazdy Polisia.kz.
Baıqaýǵa Soltústik Qazaqstan oblysynyń QAJ júıesindegi bes mekemeden sottalǵandardyń 18 shyǵarmashylyq jumysy qatysty. Qazylar alqasynyń nazaryna kartınalar, ulttyq qazaq kıimderiniń zamanaýı úlgide qolmen tigilgen nusqalary, sondaı-aq ermeksazdan jasalǵan kompozıtsııalar usynyldy.
Іs-sharanyń qurmetti qonaqtary qatarynda departament basshylyǵy, qoǵam belsendileri, kásibı ónertanýshylar, M.Qozybaev atyndaǵy Soltústik Qazaqstan ýnıversıtetiniń jáne beıneleý óneri mýzeıiniń ókilderi boldy.
Baıqaý barysynda árbir mekemeniń ókilderi sottalǵandardyń shyǵarmashylyq jumystaryn tanystyryp, olardyń ıdeıasy, oryndalý erekshelikteri jáne avtorlary týraly aıtyp ótti.
Usynylǵan týyndylar qatysýshylardyń kórkemdik qabiletterin ǵana emes, sonymen qatar olardyń ózin-ózi damytýǵa, shyǵarmashylyq áleýetin arttyrýǵa jáne mádenı qundylyqtarǵa baýlýǵa degen umtylysyn kórsetti.
Baıqaý qorytyndysy boıynsha úshinshi oryndy №50 mekemesiniń sottalǵan áıel azamaty zamanaýı úlgide oryndalǵan «Qazaq trenchi» ulttyq kıimimen ıelendi. Ekinshi oryn №52 mekemesiniń sottalǵan azamatyna «Týǵan ólkeniń altyn shýaǵy» kartınasy úshin berildi. Al qurmetti birinshi orynǵa №52 mekemesiniń taǵy bir sottalǵan azamaty «Kúzgi tań» kartınasymen ıe boldy.
Baıqaýdyń úzdik jumystary endi respýblıkalyq kezeńge joldanyp, onda Soltústik Qazaqstan oblysynyń atynan usynylatyn bolady.
Bishkekte ómir boıyna sottalǵan azamattyń kartınalary bir saǵatta satylyp ketkenin jazǵan edik.
