SQO-da sottalǵan qyz-kelinshekter qar qalashyǵyn salyp shyqty
PETROPAVL. QazAqparat – Soltústik Qazaqstan oblysy boıynsha qylmystyq atqarý júıesi departamentiniń ES – 164/6 mekemesinde jazasyn óteýshiler qar qalashyǵyn saldy, dep habarlaıdy QazAqparat tilshisi.
SQO QAJD baspasóz qyzmetiniń málimetinshe, ES – 164/6 mekemesi – áıelder kolonııasynda sottalǵandar jańa jyldy merekeleýge daıyndyqty jeltoqsan aıynda bastaǵan. 3 jasaqta jazasyn ótep jatqandar jataqhanalardy bezendirip, merekelik kontserttik baǵdarlama ázirledi. Sondaı-aq ertegi keıipkerleri bar qar qalashyǵyn salyp shyqty. Munda túrli 20 shaqty músin bar.
«Qalashyqty aldymen qardan jasalǵan kirpishtermen qorshady. Áıelder jańa jyldyń ıesi – sıyrdyń músinin jasady. Tórge Aıaz Ata men Aqshaqardy otyrǵyzyp, basqa da ertegi keıipkerleriniń, janýarlardyń qar músinderin istedi. 3 jasaqtyń áıelderi arasynda osylaısha baıqaý uıymdastyryldy. Sondaı-aq olar shaǵyn qoıylymdaryn ázirledi», - deıdi SQO QAJD bastyǵynyń orynbasary Danııar Harıpov.
Jańa jyldyq keshke qyz-kelinshekter daıyndalyp, kostıýmder de tikken eken. Al «Belosnejka jáne 7 gnom» ertegisindegi basty keıipker - Belosnejkany jasaqtaǵy eń boıy uzyn áıel oınady.
Baıqaýdyń qorytyndysy boıynsha 1 jasaq birinshi oryndy aldy.
«Mundaı merekelerdi uıymdastyrýdyń tárbıelik jáne psıhologııalyq máni zor. Al jańa jyl erekshe mereke ǵoı, qyz-kelinshekter oǵan bir aı daıyndaldy, eshqaısy shet qalmaı shyǵarmashylyq áleýetin kórsetti, erekshe ıdeıalar usyndy», - deıdi Danııar Harıpov.
