SQO-da sottalǵan adam probatsııa ınspektoryna para berip jatqan jerinen ustaldy

PETROPAVL. QazAqparat – Soltústik Qazaqstan oblysynda probatsııa qyzmetiniń ınspektoryna para bergen sottalýshy endi úlken mólsherde aıyppul tóleýi nemese 5 jylǵa deıin bas bostandyǵynan aıyrylýy múmkin, dep habarlaıdy QazAqparat tilshisi.

SQO boıynsha qylmystyq atqarý júıesi departamenti baspasóz qyzmetiniń málimetinshe, Petropavl qalasynyń probatsııa qyzmeti bólimine jazasyn óteý úshin K. esimdi sottalýshy jiberilgen.

Oǵan QR QK 296-baby 2-bóligi «esirtki quraldaryn, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, satyp alý, saqtaý, tasymaldaý» boıynsha 80 saǵattyq qoǵamdyq jumys túrinde jaza kesilgen.

Alaıda Petropavl turǵyny qoǵamdyq jumys isteýden úzildi-kesildi bas tartqan.

Jumys kúniniń sońynda saǵat 19.00 shamasynda ol probatsııa qyzmeti bólimine kelip, qoǵamdyq jumysty oryndaýdan bosatyp, osy máseleni sheshýde kómektesýi úshin ınspektorǵa para usynǵan.

Sottalǵan problemasyn birneshe ret osylaı sheshýge tyrysqandyqtan, probatsııa qyzmeti bóliminiń ınspektory onyń usynysyna keliskendeı syńaı tanytyp, bul jaıynda departamenttiń ózindik qaýipsizdik tobyna habarlady.

Jedel is-shara barysynda sottalǵan kabınette probatsııa qyzmetiniń ınspektoryna 30 myń teńge somasynda para berip jatqan jerinde ustaldy.

Atalǵan fakti boıynsha qylmystyq is qozǵaldy.

Qazirgi ýaqytta tergeý amaldary júrgizilýde, sottalǵan K-ǵa paranyń 20-30 eselengen mólsherinde aıyppul salynbaq nemese bes jylǵa deıingi merzimge bas bostandyǵynan aıyrylýy múmkin.