SQO-da sot oryndaýshylary iri qurylys kompanııasynan 100 mln teńge qaryz óndirdi
PETROPAVL. QazAqparat – Soltústik Qazaqstan oblysynda sot oryndaýshylary iri qurylys kompanııasynan jumysshylarynyń eńbekaqysy – 100 mln astam teńgeni óndirip aldy, dep habarlaıdy QazAqparat tilshisi.
SQO Ádilet departamentiniń málimetinshe, óńirdegi iri qurylys kompanııasyna qatysty sot oryndaýshylary 2018 jyldan beri 131 atqarýshylyq is júrgizgen. Onyń barlyǵy eńbekaqyǵa qatysty.
«Kásiporynnyń jumysshylaryna qaryzy 100 mln teńgeden asyp ketken. Boryshkerdiń múlkin satýǵa istiń sotta bolýy kedergi keltirdi. Alaıda 2020 jyldyń jeltoqsan aıynda bul isti aıaqtap, óndirip alýshylardyń qaryzyn japtyq», - deıdi SQO ádilet departamenti sot aktilerin oryndaý bóliminiń jetekshisi Juldyz Baımasheva.
Jalpy byltyr óńirde memlekettik jáne jeke sot oryndaýshylar eńbekaqyǵa qatysty 6 myńǵa jýyq isti júrgizgen. Ortaq soma – 1,7 mlrd teńge.
«5662 istiń 5590-y, ıaǵnı 99 %-y óndirispen aıaqtaldy. Olardyń ishinde 5132-si boıynsha 1,2 mlrd teńge óndirilip alyndy. Qazirgi ýaqytta osy eńbekaqy qaryzy boıynsha 72 atqarýshylyq is júrgizý jeke jáne memlekettik sot oryndaýshylarynyń oryndaýynda jatyr», - deıdi Juldyz Baımasheva.
