SQO-da sońǵy jyldary ónerkásiptiń bes salasynda 15 túrli kásiporyn ashyldy

PETROPAVL. QazAqparat – Soltústik Qazaqstan oblysynyń óńdeý ónerkásibinde sońǵy bes jylda kásiporyndar sany 25 paıyzǵa artqan. Toqyraý jyldary jalpy aýmaǵy 300 myń sharshy metr bolatyn nysan bos qalsa, osy aralyqta onyń 67 paıyzy qaıta jańǵyryp, jańa óndiris ornalasty, dep habarlaıdy QazAqparat tilshisi.

SQO ákimdiginde ónerkásiptegi ınvestıtsııalyq jobalarǵa arnalǵan jıyn ótti. Óńir basshysy Qumar Aqsaqalovtyń aıtýynsha, sońǵy úsh jylda oblysqa 850 mlrd teńge ınvestıtsııa tartyldy. Osylaısha 2018 jylmen salystyrǵanda ınvestıtsııa kólemi 1,5 esege ósken.

«2018 jyly ınvestıtsııa kólemi óńirde bir adamǵa 384,8 myń teńge boldy. Respýblıkadaǵy kórsetkish 611,7 myń teńge edi, aıyrmashylyq - 60 %. Ótken jyldyń qorytyndysy boıynsha bul kórsetkishti óńirde 616,5 myń teńgege jetkizdik. Respýblıkada - 696,9 myń teńge, ıaǵnı aıyrmashylyq 13 % ǵana. Al sheteldik ınvestıtsııa osy aralyqta 32 ese ósken, 2018 jyly 1,5 mln AQSh dollary bolsa, bıylǵy jarty jylda ol 47,8 mln dollarǵa jetti», - deıdi Qumar Aqsaqalov.

Ónerkásip kásiporyndary syrtqy saýdany da oń jolǵa qoıǵan. 2018 jyldan beri eksport kólemi 2,3 ese artyp, 110 mln dollarǵa jetip otyr.

«Kezinde kóptegen zaýyt-kásiporyndar toqtap, ǵımarattary bosap qaldy. 5 jyl buryn revıtsııa júrgizip, osyndaı 300 myń sharshy metrdiń jaı turǵanyn anyqtadyq. Biz olardy jóndep, jańa jobalardy iske asyryp jatyrmyz. Qazirgi ýaqytta 67 % iske qosyldy. Al ınvestıtsııalyq jobalardy iske qosýdyń bereri kóp, bul jańa jumys oryndary, salyq túsimderiniń artýy jáne óńir turǵyndarynyń jaǵdaıy jaqsarady», - deıdi SQO ákimi.

Qumar Aqsaqalovtyń aıtýynsha, bıylǵy 9 aıda 10 myńǵa jýyq jańa jumys oryny quryldy, 23 myń adam turaqty jumysqa ornalasty. Salyq túsimi 36,4 %, zeınetaqy qoryna aýdarymdar 25,7 % artqan.