SQO-da sońǵy úsh jylda 1900 shaqyrym jol jóndeldi
Soltústik Qazaqstan oblysy ákimdiginiń kezekti otyrysy ótip, bul joly logıstıka, ınfraqurylym boıynsha atqarylǵan jumys saralandy.
Oblys ákimi baspasóz qyzmetiniń málimetinshe, úsh jylda joldardy qalypqa keltirýge 76 mlrd teńge jumsalǵan. Onyń jartysyna jýyǵy bıyl ıgerildi. Jumystardyń bir bóligi «Nurly jol» baǵdarlamasy aıasynda júzege asty.
Kelesi jyly jol jóndeý jumystary jalǵasady. Basty nazar aýdan ortalyqtaryna aýysady.
«Bizge aýdan ortalyqtaryna deıin jaqsy joldyń bolǵany mańyzdy. Kelesi jyly osy jumysty bastaımyz. Chkalov, Rýzaev, Vozvyshenka, Blagoveşenka sııaqty buryn aýdan ortalyqtary bolǵan eldi mekenderdi de umytpaımyz. Bul burynǵy aýdan ortalyqtaryna da qatysty. Keıbir aýyldarda da jol jóndeledi. Aýdan ákimderi naqty jospar kórsetý kerek, aqsha bólinedi», - dedi Qumar Aqsaqalov.
Aıyrtaý aýdanyna qarasty Saýmalkóldegi 15 kóshege, Beskólde 7 kóshege jańa asfalt tóseledi. Qarajattyń kóp bóligi negizgi kóshelerge bólinbek. Qala mártebesinde qalǵan Býlaev qalasy joldaryn oblys bıýdjeti esebinen jóndeý josparlanǵan. Osylaısha, oblys aýmaǵyndaǵy joldyń 65% qanaǵattanarlyq jaǵdaıǵa jetkizilmek.
Sondaı-aq jol qurylysynda tıisti qadaǵalaý joq. Kompanııalar jol jóndeýde kesteden qalyp qoıǵan.
«Mundaı olqylyqqa jol berilmeýi kerek. Atqarylatyn jumys aýqymdy, biraq nátıjesi shamaly. Tapsyrylýy tıis keı nysandarda jumys áli bitpegen. Іstelgen jumysqa 1 jyl ǵana kepil beredi. Bul durys emes. Merdigerler tapsyrǵan jumystarynyń sapasyna eń kemi 5 jyl kepil berýleri kerek. Sol kezde múmkin jumystaryn tıisinshe atqaratyn bolady. Bul aýlaishilik aýmaqtardy jóndeýge de qatysty», - dedi oblys ákimi Qumar Aqsaqalov.
