SQO-da sońǵy úsh kúnde 9 alaıaqtyq deregi tirkeldi
Vedomstvonyń málimetinshe, petropavldyq kásipker ınternet arqyly qurylys materıaldaryna tapsyrys bergen. «Satýshy» aldyn-ala tólem jasaýdy suraǵan. 2 mln astam teńgeni aýdarǵan er adam alaıaqqa aldanǵanyn kesh túsinipti. Qolyna aqsha tıisimen-aq «satýshy» telefonyn óshirip, saıtty ınternetten óshirip tastaǵan.
Petropavldyń taǵy úsh turǵyny, sonyń ishinde 75 jastaǵy áıel de bar, banktan habarlastyq degen qylmyskerlerge jem bolǵan. Taǵy bireýinde alaıaq jábirlenýshiniń atyna shaǵyn nesıe rásimdese, taǵy eki jaǵdaıda turǵyndar joq taýar úshin jáne ótirik jalǵa beriletin páter úshin aldyn ala tólem jasaǵan.
«Sońǵy ýaqytta týystarynyń bireýi polıtsııaǵa tústi dep, máseleni sheshý úshin belgili bir somany berý kerek dep telefon soǵatyn alaıaqtar kóbeıgen. Toǵyz alaıaqtyqtyń ekeýi osyndaı stsenarıımen jasalǵan. Aqsha talap etip, telefon shalǵan jaǵdaıda suraǵanyn berýge asyqpańyz. Birden týysyńyzǵa habarlasyńyz. Sondaı-aq sizge banktiń qaýipsizdik qyzmetiniń qyzmetkerimin dep habarlassa da birden telefon tutqasyn qoıyńyz. Ondaı jaǵdaıda shottyń jaǵdaıyn bilý úshin bank fılıalyna barǵan jón. Bógde adamdarǵa bank kartasyna qatysty esh aqparatty bermeńizder. Sms-pen keletin bir rettik kodty aıtýdy suraıtyndar bar. Sondaı-aq ózderi jańa shot ashyp, aldaý arqyly soǵan aýdarýdy usynatyndar bar», - deıdi SQO PD krımınaldyq polıtsııa basqarmasynyń bastyǵy Petr Klımov.
Polıtseıdiń aıtýynsha, alaıaqtardyń arbaý joldary kóp.
«Sonyń biri – bankten menedjermin dep habarlasyp, nesıe alýǵa ótinishiniń qanaǵattandyrylǵanyn aıtady. «Men ótinish bergen joqpyn» degen jaǵdaıda, alaıaq onyń kúshin joıý úshin birqatar málimetti berýdi suraıdy. Onyń barlyǵy shotqa qol jetkizý maqsatynda jasalady. Sondyqtan abaı bolýlaryńyzdy, egde jastaǵy týǵan-týystaryńyzdy eskertýlerińizdi suraımyz», - deıdi Petr Klımov.