SQO-da sońǵy kezderi ákimshilik aıyppuldaryn tólemeıtinderdiń sany artqan
ASTANA. QazAqparat - Alkogoldi ishimdik iship qoǵamdyq tártipti buzǵandar budan bylaı túzetý jumystaryna jegilsin. Mundaı usynysty soltústikqazaqstandyq polıtseıler kóterdi, dep habarlaıdy Habar 24 telearnasy.
Óıtkeni sońǵy kezderi ákimshilik aıyppuldaryn tólemeıtinderdiń sany artqan. Máselen 2016 jyly oblysta 12 myńnan astam adamǵa ákimshilik hattama toltyryp, olarǵa jalpy somasy 114 mln teńgeden astam aıyppul salynypty. Al onyń búgingi kúni tek 51 paıyzy ǵana memleket qazynasyna túsken. Sondyqtan bul másele aımaqta ózekti bolyp otyr.
«Búgingi kúni spırttik ishimdik iship qoǵamdyq tártipti buzǵandardan aıyppuldaryn óndirip alý qıynǵa soǵyp otyr. Óıtkeni mundaı azamattarǵa aıyppul bir emes, birneshe márte salynǵan. Onyń ústine kóbi jumyssyz. Sondyqtan bul jandardy túzetý jumystaryna tartý qajet. Mine zańnamaǵa osyndaı ózgertýler engizilse quba-qup bolar edi», - deıdi oblystyq ІІD jergilikti polıtsııa qyzmetiniń basshysy Qanat Aıtbaev.
