SQO-da sońǵy eki aptada KVI juqtyrý 25 paıyzǵa qysqardy
Oblystyq ákimdiktiń otyrysynda SQO densaýlyq saqtaý basqarmasy basshysynyń mindetin atqarýshy Nurlan Aımanov koronavırýspen aýyrǵandar sanynyń kemigenin aıtty. Onyń aıtýynsha, qazir 298 syrqat statsıonarda em qabyldap jatyr. Máselen 20 qarashada aýyryp jatqandar sany 677 bolǵan. Búginde statsıonarlar 18 %-ǵa júktelgen. Reanımatsııadaǵy aýyr naýqastardyń sany azaıǵan, ol 27 %-ǵa ǵana tolyq. Jansaqtaý bólimshelerinde statsıonarlyq emdeýde 32 syrqat bar. Jalpy búgingi kúni 3468 adam emdelip, dárigerlerdiń baqylaýyna alynǵan. Sonyń ishinde 3170 adam úı karantıninde jatyr. Olardyń jartysynda aýrý belgileri bolmasa, qalǵanynda jeńil ótip jatyr.
«Ókpeni jasandy jeldetý apparatynda jatqan naýqastardyń sany 30-dan 14 adamǵa deıin, óte aýyr 11-den 6-ǵa deıin qysqardy. Budan basqa, turaqty túrde medıtsınalyq ottekti qajet etetin statsıonarlyq syrqattardyń sany 80 %-dan 60 %-ǵa deıin tómendedi. 20 qarashada 396 naýqas ottegige qosylǵan bolsa, 21 jeltoqsandaǵy jaǵdaı boıynsha olardyń sany 196-ǵa deıin qysqardy. Jeltoqsan aıynda juqpaly aýrýlar aýrýhanalaryna táýliktik gospıtalızatsııa 2,5 esege tómendedi jáne ortasha eseppen 25 naýqasty qurady», - deıdi Nurlan Aımanov.
COVID-19 bar ambýlatorııalyq naýqastardy anyqtaý, tekserý jáne emdeý boıynsha medıtsınalyq 68 mobıldi brıgada jumys isteıdi. Onyń 16-sy oblys ortalyǵynda, qalǵandary aýyldyq jerlerde. Pandemııa bastalǵaly brıgadalar 75 948 shaqyrtýǵa shyqqan. Jedel járdem qyzmetin shaqyrýlar sany 12 %-ǵa 450-den 400-ge deıin tómendegen.
Jalpy SQO-da indet bastalǵaly KVI juqtyrýdyń 34 400 jaǵdaıy tirkelip, 30 771 adam táýir boldy.