SQO-da sońǵy bir aptada kene shaqqan 86 adam dárigerge qaralǵan

PETROPAVL. QazAqparat – Soltústik Qazaqstan oblysynda kene shaǵý ótken jyldyń sáıkes merzimimen salystyrǵanda 1,8 ese artqan. Kún jylynǵaly 260 adam dárigerdiń kómegine júgindi, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, kene shaqqan alǵashqy adam naýryz aıynda emhanaǵa qaralǵan. Osy kúnge deıin jándikten 260 adam zardap shekse, sonyń 82-si – 14 jasqa deıingi bala. Ótken jyldyń uqsas kezeńimen salystyrǵanda kene shaǵý kórsetkishi 1,8 ese ósken. Tek sońǵy aptada 86 adamǵa, sonyń ishinde 24 balaǵa dárigerdiń kómegi qajet boldy.

«Byltyr kene entsefalıti 9 adamnan anyqtalsa, bıyl bul aýrý tirkelgen joq. Kene entsefalıti - ortalyq júıke júıesiniń basym bóligin zaqymdaıtyn jiti ınfektsııalyq aýrý. Ony ıksodtik keneler taratady. Qorǵaný úshin turǵylyqty jeri boıynsha tirkelgen emhanada vaktsına qoıdyrýǵa bolady, biraq ekpe almas buryn dárigerge kóringen jón», - deıdi oblystyq sanıtarııalyq-epıdemıologııalyq baqylaý departamentiniń bas mamany Aınash Saǵandyqova.

Mamannyń aıtýynsha, tabıǵat aıasyna shyqqanda saqtyq sharalaryn umytpaǵan jón.

«Ádette kene adamǵa shópten nemese butadan jabysady. Olar 1,5 metrden joǵary kóterilmeıdi, sondyqtan adamnyń aıaǵyna jabysyp, sorýǵa yńǵaıly oryn izdep joǵary qaraı órmeleıdi. Kene adamdy birden shaqpaıdy, deneden kózge túse qoımaıtyn oryn izdeıdi. Sondyqtan ormannan nemese daladan kelgennen keıin deneni durystap teksergen jón. Sondaı-aq tabıǵat aıasyna shyǵar aldynda arnaıy krem-gelderdi, aerozolderdi qoldanýǵa keńes beremin», - deıdi Aınash Saǵandyqova.

Kene shaǵyp alǵan jaǵdaıda medıtsınalyq kómek alý úshin turǵylyqty jeri boıynsha emhanaǵa barý qajet.

Esterińizge salaıyq, byltyr kene shaqqan Qyzyljar aýdanynyń 60 jastaǵy turǵyny qaıtys bolǵan edi.