SQO-da sońǵy bes jylda 40 myń adam jańa páterge kóshti
Soltústik Qazaqstan oblysy ákimdiginiń málimetinshe, óńir osy jyldyń 7 aıynda birqatar sala boıynsha joǵary kórsetishterge qol jetkizgen, máselen, aýyl sharýashylyǵy salasynda ónim – 105,5 %, ónerkásipte – 101,8 %, ınvestıtsııalar – 103,7 %, qurylys – 105 %, turǵyn úı tapsyrý – 103,4 %, saýda – 102 % artqan.
«Byltyr oblysta «Qyzyljar» arnaıy ekonomıkalyq aımaǵy qurylyp, sheteldik nemis kompanııasymen birge aýyl sharashylyǵy tehnıkasyn qurastyratyn zaýyt ashyldy. Nátıjesinde sharýalar traktor-kombaıyndardy 27 % jeńildikpen alýǵa múmkindik aldy. Byltyr 92 tehnıka satylsa, bıyl qurastyrylýy kerek 318 mashınanyń 294-i daıyn tur. Báriniń ıesi bar. Taǵy bir kásiporyn – Petropavl elektrtehnıkalyq zaýyty. Bıyl 5 mlrd teńgeniń ónimi shyǵarylmaq, 160 adam jumysqa ornalastyrylady. Bıyl 3 joba júzege asady. Olar – jeńil bolat qurylymdaryn, DSP jáne elektr qalqan qondyrǵylaryn shyǵaratyn zaýyttar», - dedi SQO ákimi Qumar Aqsaqalov.
Óńir búginde lamınattalǵan fanerdi shetten tasymaı, ózi shyǵarady, sondaı-aq artylǵanyn Nur-Sultan, Almaty, Shymkent, Atyraý sııaqty iri shaharlarǵa jáne Eýroodaq elderine satady.
Kirpish te SQO-da shyǵaryla bastady. Kásiporyn bar qajettiliktiń úshten birin jaýyp otyr.
Jylyna 13 myń tonna qurǵaq qurylys qospalaryn shyǵaratyn zaýyt, jyl sońyna deıin avtoklavty gazoblok jáne plıta óndirisin jolǵa qoımaq.
Jaqynda Petropavlda temir-beton ónimderin shyǵaratyn kásiporyn da iske qosylmaq. Nátıjesinde jabýǵa arnalǵan plıtalar, beton dóńgelekter, irgetasqa arnalǵan betondar syrttan ákelinbeıdi.
Óńirde qurylys materıaldaryna degen qajettilik jyldan-jylǵa artyp keledi. 2017 jyldan beri qurylys jumystaryn 1,5 ese ósken. 40 myń turǵyn jaıly jańa baspanaǵa ıe boldy.
