SQO-da sońǵy aptada koronavırýspen aýyrǵandar sany eki ese ósti
PETROPAVL. QazAqparat – Soltústik Qazaqstan oblysynda koronavırýsty juqtyrǵandar sany eki ese ósti, tek ótken táýlikte óńirde jańadan 110 jaǵdaı tirkelgen, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, oblysta koronavırýs boıynsha epıdemıologııalyq jaǵdaı turaqsyz. Syrqattanǵandar sany ósip keledi.
«Sońǵy aptada KVI juqtyrý 408-den 684 jaǵdaıǵa deıin 2 ese ósti jáne odan ári artyp keledi. Eń kóp ósim Petropavlda - 105 jaǵdaı tirkelgen. Bul - 1,5 ese kóp. Taıynsha aýdanynda 3 ese ósip, 50 jaǵdaı, Qyzyljar aýdanynda 1,6 ese ósip, 22 jaǵdaı tirkeldi. Syrqattanǵandardyń 89 %-y dárigerge aýyryp kóringen. Sondaı-aq aýyrǵandardyń jasy ózgerdi, qazirgi ýaqytta syrqattanǵandardyń 57 %-y – 40 jastan kishi, buryn bul kórsetkish 40 %-dan aspaıtyn», - deıdi Áset Jumataev.
Ótken táýlikte oblysta koronavırýsty juqtyrýdyń 110 jaǵdaıy tirkeldi. 102 adamda aýrý belgileri bolǵan. Aýyrǵandardyń basym bóligi – Petropavl turǵyndary – 46 adam. Ekinshi orynda týrıstik aımaq – Aıyrtaý aýdanynda 14 adam jáne Taıynshada 12 adam tirkelgen.
Jalpy oblysta osy ýaqytqa deıin KVI juqtyrýdyń 16 613 jaǵdaıy anyqtaldy.
