SQO-da sońǵy 3 jylda medıatorlardyń qatysýymen kólik salasynda bir de bir is qaralmaǵan
PETROPAVL. QazAqparat – Soltústik Qazaqstan oblysynda kásibı medıatorlar jetispeıdi. Sońǵy úsh jylda kólik salasynda jasalyp, sotta qaralǵan qylmystyq, ákimshilik, azamattyq isterdiń eshqaısysynda medıatorlar jumys istemegen, dep habarlaıdy QazAqparat tilshisi.
Soltústik Qazaqstan kólik prokýratýrasynyń málimetinshe, óńirde daýlasýshy taraptardy sotqa deıin jetkizbeı mámilege keltiretin medıatsııa ınstıtýty tıisti deńgeıde jumys istep jatqan joq. Oǵan dálel – sońǵy úsh jylda Soltústik Qazaqstan kólik prokýratýrasynyń qadaǵalaý aımaǵy - kólik salasynda jasalǵan qylmystyq, ákimshilik, azamattyq isterdiń bir de bireýine beıtarap jaq – medıatorlar aralaspaǵan.
SQO-da kólik prokýrorlarynyń qatysýymen byltyrǵy jyly 15 qylmystyq is, 32 ákimshilik is qaralǵan. Bıyl jyl basynan beri 11 qylmystyq is sotqa joldansa, 27 ákimshilik jáne bir azamattyq is boıynsha sot sheshimi shyqty.
«Negizgi sebepterdiń biri – halyqtyń medıatsııa jaıly bilmeýi, onyń múmkindikteri jaıynda habarsyz bolýy, mán-maǵynasyn túsinbeýi. Ekinshi sebebi – óńirde kásibı medıatorlardyń joqtyǵy. Máselen M.Jumabaev aýdanynda 16 kásibı emes medıator bolsa, sonyń bireýi ǵana naqty jumys isteıdi. Aqqaıyń aýdanynda osyndaı 9 medıator bolsa, munda da sonyń bireýi óz mindetin atqaryp júr. Mamlıýt aýdanynda 7 kásibı emes medıatordyń tek ekeýi ǵana jumys istep keledi», - deıdi Soltústik Qazaqstan kólik prokýrory Abylaıbek Ordabaev.
Bul olqylyqtyń ornyn toltyrý maqsatynda Soltústik Qazaqstan kólik prokýratýrasy «Halyqaralyq medıatsııa ortalyǵy» RQB SQO boıynsha ókili Altyn bı Besembaevamen memorandýmǵa otyrdy.
«Memorandým nátıjesinde bizdiń medıatorlarymyz «Halyqaralyq medıatsııa ortalyǵy» RQB oqytýdan ótip, bilimderin jetildire alady. Bul yntymaqtastyq pen ózara is-qımylǵa, sondaı-aq óńirde medıatsııany jan-jaqty damytýǵa múmkindik bermek. Sot protsedýrasy shynymen qajet bolǵan kezde nemese balama ádister sátsiz bolǵan jaǵdaıda ǵana qoldanylýy kerek. Іstiń sotqa jetpeı, mámilege kelý arqyly sheshilýi sýdıalarǵa, advokattar men taraptarǵa tıimdi bolmaq», - deıdi kólik prokýrory.
