SQO-da sońǵy úsh jylda qoldanystaǵy 30 gaz ballony jarylǵan
Soltústik Qazaqstan oblysynda sońǵy úsh jylda 27 turǵyn úıde jáne úsh turmystyq emes nysanda gaz ballony jarylǵan. Mamandardyń aıtýynsha, kópshilik gaz ballonyn durys qoldanýdi bilmeıdi, dep habarlaıdy Kazinform.
Esterińizge salaıyq, SQO-da ótken aptada eki qabatty turǵyn úıdegi páterlerdiń birinde gaz ballonynyń jarylýynan 12 jasar qyz qaıtys boldy, onyń 22 jastaǵy aǵasy aýyr kúıik alyp aýrýhanaǵa tústi.
SQO Tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, gaz ballondaryn eki qabattan joǵary úılerde qoldanýǵa tyıym salynǵan. Bitken ballonǵa gaz quıý kezinde eskerile bermeıtin jaıt – bos ydys tek 85 % toltyrylýy tıis. Suıyq gaz qysymy ósken kezde, osy bos oryn qaýipsizdik úshin kerek.
«Gaz ballonyn satatyn, gaz quıatyn oryndar turmystyq ballondardyń tehnıkalyq jaǵdaıyn tekserýleri kerek. Sondaı-aq tutynýshylarǵa satylatyn ár ballonǵa kepildik talonyn berýi qajet. Biraq is júzinde munyń biri de jasalmaıdy. Sondaı-aq qoldanystaǵy ballondar zań boıynsha eń keminde 5 jylda bir ret tekserilýi tıis. Jarylǵan ballondardyń birinde tekserilgendigi týraly qujat bolmady», - deıdi Dmıtrıı Rastıhın.
Ónerkásiptik qaýipsizdik komıteti SQO boıynsha departamentiniń bas mamany Arman Basenovtyń aıtýynsha, keı turǵyndar turmystyq gaz ballondaryn avtomobılge gaz quıý stansalarynda toltyryp jatady. Buǵan tyıym salynǵan.
«Baspanalarda gazy bar ballondar jylytý radıatorlarynan jáne basqa da jylytý aspaptary men peshterden keminde 1 metr qashyqta jáne ashyq ot bolǵan jaǵdaıda keminde 5 metr alys turýy tıis. Osyndaı qarapaıym normalardy saqtaý turmystyq gaz qurylǵylaryn qaýipsiz paıdalanýdy qamtamasyz etedi jáne ómirdi saqtaıdy», - deıdi Arman Basenov.
