SQO-da sońǵy úsh aıda 40 myńǵa jýyq adam JRVI-men aýyrdy

PETROPAVL. KAZINFORM – Soltústik Qazaqstan oblysynda jiti respıratorlyq vırýstyq ınfektsııany juqtyrǵandar sany artty.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, ótken aptada oblysta JRVI-di juqtyrýdyń 3455 jaǵdaıy tirkelgen. Bul onyń aldyndaǵy aptamen salystyrǵanda 9% kóp.

Budan bólek A (H1N1-pdm09) tıpti tumaýmen 12 adam aýyryp, dárigerlerge qaralǵan. 

Mamandardyń aıtýynsha, JRVI men tumaý aýrýynyń negizgi belgileri: joǵary temperatýra, jalpy ıntoksıkatsııa, álsizdik, tamaq aýrýy, muryn bitelýi.

Alǵashqy belgileri baıqalǵan kezde ózin-ózi emdeýge bolmaıdy, dereý medıtsınalyq kómekke júginý qajet, dárigerdi úıge shaqyrý kerek, aýrýdy taratpaý úshin naýqas balany balabaqshaǵa nemese mektepke jibermegen jón. 

JRVI men tumaý – qaýipti, asqanǵan jaǵdaıda, kóbine ókpeniń qabynýyna ákeledi. 

Sanıtar dárigerler JRVI men tumaýdyń aldyn alý úshin bólmeni kún saıyn jeldetýge, qoldy muqııat jýýǵa, antıseptık quraldardy paıdalanýǵa, aýrý kúsheıgen kezde adamdar kóp jınalatyn is-sharalardan bas tartýǵa ne betperde taǵýǵa, ımmýnıtetti nyǵaıtýǵa, sportpen shuǵyldanýǵa keńes beredi. 

Jalpy jańa epıdemııalyq maýsym bastalǵaly 39965 adam JRVI juqtyrǵan. Naýqastardyń 67% nemese 27 myńǵa jýyǵy - 14 jasqa deıingi balalar. 

Buǵan deıin SQO-da shoshqa tumaýyn juqtyrǵandar tirkelgenin jazǵan edik.