SQO-da sońǵy qońyraýǵa oraı ustazdar men ata-analarǵa birqatar tyıym salyndy
PETROPAVL. KAZINFORM – Soltústik Qazaqstan oblysynda búgin Bilim basqarmasynyń basshysy Aınagúl Suraǵanova oqý jylynyń aıaqtalýyna baılanysty birqatar negizgi máselege toqtaldy.
Vedomstvo basshysy pedagogıkalyq ádep týraly ustazdardyń esine salyp, ata-analardy sybaılas jemqorlyq, quqyq buzýshylyq jaıynda eskertti.
- Ata-analardan qarajat jınaýǵa, anımatorlardy, agenttikterdi jáne jeke stýdııalardy tartýǵa, mashınalardy jalǵa alý jáne mashınalar kortejderin qurýǵa, mektepke deıingi bilim berý uıymdarynyń túlekteri men 4-synyp oqýshylary úshin saltanatty is-sharalar ótkizýge jol berilmeıdi, - dedi Aınagúl Suraǵanova.
SQO-da qazir 74 myńǵa jýyq oqýshy bar, sonyń 7 myńǵa jýyǵy bıyl birinshi synypty bitirip jatyr. Jalpy osy jyly 1-11 synyp oqýshylary úshin oqý sabaqtary 23 mamyrda aıaqtalady. Saltanatty is-sharany mektepterde ótkizý usynyldy.
- Bıyl «Altyn belgi» joǵary mektep nagradasyna 122 úmitker bar, byltyr 84 oqýshy bolǵan. 11-synypta úzdik attestatqa 230 úmitker jáne 9-synypta 434 úmitker bar. Oblysta jazǵy UBT 16 mamyrda bastalyp, 4 shildede aıaqtalady. Óńirde eki testileý pýnkti bar. Olar Petropavldaǵy balalar men jasóspirimder shyǵarmashylyǵynyń oblystyq ortalyǵynda jáne Ǵ.Músirepov atyndaǵy aýdannyń Novoıshım aýylynda ornalasqan, - dedi basqarma basshysy.
Emtıhandardan keıin kolledjderge túsý úshin 9 synyp túlekteri túsý emtıhandary joq jumysshy mamandyqtaryna jáne orta býyn mamandaryna (jumysshylar: tas qalaýshy, dánekerleýshi, aspaz, shashtaraz, kondıter) arnalǵan attestattyń orta baly negizinde túse alady. Pedagogıkalyq jáne medıtsınalyq mamandyqtarǵa qosymsha testileý júrgiziledi.
Jalpy SQO-da 24 kolledj bar, onda 11 147 stýdent oqıdy. Onyń 3,5 myńy bıyl dıplom alady.
Buǵan deıin SQO-da 6-synyp oqýshysy týberkýlezdiń ashyq túrin juqtyrǵanyn jazǵan edik.